80-vjetori i themelimit të Shkollës Ushtarake “Skënderbej”, Vengu: Vatër e edukimit të brezave

80-vjetori i themelimit të ish-Shkollës së Mesme Ushtarake “Skënderbej” mblodhi në një aktivitet ish-nxënës, pedagogë dhe drejtues të ish-Shkollës së Mesme Ushtarake “Skënderbej”, por edhe oficerë dhe përfaqësues të Forcave të Armatosura.

Të pranishëm ishin edhe ministri i Mbrojtjes, Pirro Vengu, zëvendësministri i Mbrojtjes, Enkelejd Joti, deputetë të Kuvendit dhe shefi i Shtabit të Përgjithshëm të Forcave të Armatosura gjenerallejtënant Arben Kingji.

Aktiviteti nisi me një interpretim emocionues të himnit kombëtar nga kuarteti i harqeve dhe këngëtarët e orkestrës simfonike të Forcave të Armatosura të Shqipërisë, ndërsa për të kujtuar kontributin e këtij institucioni në edukimin e brezave u shfaq për të pranishmit, një dokumentar kushtuar historikut të shkollës.

Ministri i Mbrojtjes, Pirro Vengu, nënvizoi vlerat që Shkolla “Skënderbej” ka dhënë për arsimimin ushtarak shqiptar dhe zhvillimin e Forcave të Armatosura.

“Emri Skënderbegas, ende reflekton peshën historike në radhët e Forcave tona të Armatosura. Skënderbegasit apo Beksat, siç ju e përdorni, u shquan dhe shquhen si shembull i përkushtimit, nderit, disiplinës dhe atdhetarisë. Këtë e dëshmon prania juaj sot këtu, punët dhe veprat tuaja ndër dekada. Në këtë kontekst, kjo shkollë mendoj ja ka dalë me krenari të edukojë breza të tërë dhe padyshim si çdo shkollë, ajo lëshon rrënjë të thella edhe nxjerr degë me plot fryte dhe besoj se duhet ta rimarrim patjetër si shembull, shembullin e atyre pedagogëve që me përkushtimin e të cilëve është ndërtuar, jo vetëm një gjeneratë e tërë drejtuesish ushtarakë që sot e kësaj dite vijojnë e mbajnë përgjegjësi shumë të nderuara, por edhe metodat dhe përkushtimin, të cilat duhet t’i rizbulojmë”, theksoi Vengu.

Ai premtoi që në përvjetorin e ardhshëm, të mblidhen në një sallë më të madhe, e cila do të jetë pjesë e kampusit të ri të Akademisë së Forcave të Armatosura, në Tufinë.

Në fjalën e tij, shefi i Shtabit të Përgjithshëm të FA gjenerallejtënant Arben Kingji e cilësoi këtë institucion si një themel të rëndësishëm në formimin profesional të brezave pas Luftës së Dytë Botërore.

Nga ana e tij, komandanti i Akademisë së Forcave të Armatosura, gjeneral brigade Bardhyl Nuredinaj, edhe si një ish-nxënës i Shkollës “Skënderbej” theksoi rëndësinë e saj si vatër edukimi dhe formimi të ushtarakëve dhe qytetarëve të përkushtuar për shoqërinë.

Po ashtu, ish-komandanti i kësaj shkolle, Mikali Vaso, shprehu mirënjohjen për kontributin e pedagogëve dhe nxënësve të shkollës.

Në këtë ceremoni u shpërndanë certifikata nderi për katër personalitete të shquara të dala nga kjo shkollë.