29-vjet nga Referendumi në Luginë, flet Muharrem Salihu nga Medvegja për pasivizimin e adresave të mbi 6 mijë shqiptarëve

29 vite më parë, në tri komunat shqiptare në Preshevë, Medvegjë e Bujanoc u mbajt Referendum për Autonomi Politike e Territoriale, me të drejtë bashkimi me Kosovën, ku morën pjesë 98 për qind e shqiptarëve që jetonin atje.

Megjithëse ata arritën në mesin e shumë vështirësive ta bëjnë këtë referendum, gati 30 vite më vonë, shqiptarët që jetojnë në Serbi po vazhdojnë të përballen me probleme të shumta, ku më i fundit është ai i pasivizimit të adresave.

Anëtari i Këshillit Komunal të Medvegjës, Muharrem Salihu gjatë një interviste për Telegrafin ka folur për pasivizimin e adresave të shqiptarëve në Medvegjë.

“Në Medvegjë janë mbi 6 mijë shqiptarë që kanë ngelur pa dokumente dhe angazhimi ynë ka qenë në Medvegjë në mënyrë që ta shpëtojmë Bujanocin dhe Preshevën, gjë që me sa duket nuk kemi gjet akoma përkrahje të mjaftueshme”, tha Salihu.

Sipas Salihut, në Bujanoc ka filluar edhe ndërtimi i banesave kolektive, siç tha ai për të ndikuar në demografinë e atij vendi.

“Në Bujanoc po punohet në dy drejtime, njëri është tradicional, përmes pasivizimit klasik siç është bërë në Medvegjë dhe tjetri është shtimi i popullsisë, me përkatësi joshqiptare, në mënyrë që së paku në vitet e ardhshme të arrijnë sa më shpejt që të realizojnë ato që i kanë dizajnuar”, u shpreh Salihu.

Familje jo-shqiptare, siç rrëfeu Salihu kanë qenë të strehuara nëpër disa kampe në Bujanovc, kjo si parakusht për t’i strehuar pastaj në një vendbanim të përhershëm, në banesa kolektive, megjithëse theksoi se në Kuvendin Komunal të Bujanovcit shqiptarët ende e kanë shumicën dhe e ka miratuar ndërtimin e këtyre banesave kolektive.

I pyetur nëse ka pasur reagime nga Bashkimi Evropian, apo nga ambasadat e huaja në Serbi, për pasivizimin e adresave, ai tha se sa herë që e kanë diskutuar, kanë marrë reagime për mosreagimin e shtetit të Kosovës e Shqipërisë për këtë problem.

“Diskutimet e fundit, dhe jo vetëm, gjithmonë na tërhiqet vërejtja se pse nuk reagojnë Shqipëria dhe Kosova për këtë problem. Nuk është problemi se nuk duan të reagojnë ndërkombëtarët përveç disa këshillave që i marrin dhe i regjistrojnë ankesat tona nuk bëjnë, sepse këtë duhet ta nxiste për 20 vite Kosova, edhe pse Serbia faktikisht nuk e ka njohur Kosovën, por kjo nuk është arsye që Kosova të mos flas për shqiptarët në Serbi dhe në rastin më të keq të mos përdorte ata për baraspeshë që Serbia vazhdimisht i shtron, apo i sajon për pakicën serbe këtu në Kosovë”, theksoi Salihu gjatë intervistës për Telegrafin.

Janë vetëm tri komuna me shqiptarë në territorin e Serbisë, siç tha Salihu që janë lënë në mëshirën e fatit.

Ai përmendi një intervenim të ish-ministrit të Jashtëm të Shqipërisë, Gent Cakaj i cili vizitoi komunat e shqiptarëve në Serbi disa herë, e në praninë e të cilit u nënshkrua unifikimi i listës së përbashkët të partive politike shqiptare për të marr pjesë në zgjedhjet në Serbi.

Salihu theksoi se kërkesat e shqiptarëve në Serbi pavarësisht se nga kush janë të artikuluara duhet të jenë pjesë e dialogut.

“Sa i përket vizitës së Lajçak, pritshmëritë janë të mëdha, po shpresojmë se në horizont po shihet fundi i këtij dialogu maratonik, dhe së paku të konsiderohen kërkesat tona”, u shpreh Salihu gjatë intervistës për Telegrafin.

Ai tha se presin nga Bashkësia Evropiane që të anulohen të gjitha vendimet për pasivizim të adresave, të formohet një komision për verifikimin e shpopullimit të tri komunave shqiptare në Serbi dhe të diskutohet për një kthim të asistuar në mënyrë që të vendoset popullata në shtëpitë e veta, aty ku ka qenë, sepse kërkesat sipas tij janë të mëdha. /Telegrafi/