Zana Berisha, e gatshme për finalen e zgjedhjes së “Miss Universe 2018”

Të gjithëve u është e njohur se Zana Berisha, aktualisht është në Bangkok ku po përgatitet për mbrëmjen finale, ndërkaq jemi të sigurt se ajo do të hyjë në mesin e më të bukurave, edhe pse të gjithë kemi dëshirë që edhe të fitojë.

Bukuroshja 23-vjeçe nga Theranda, Zana Berisha, është zgjedhur më 30 qershor 2018 në garën zyrtare të Miss Universe Kosova për të përfaqësuar vendin tonë në finalen botërore, transmeton Telegrafi.

Në të gjitha aktivitetet dhe paraqitjet, ajo shfaqet me simbolet e shtetit të Kosovës të cilin e prezanton me krenari dhe dinjitet!

Në zgjedhjen e sivjetme të Miss Universe në Bankok, Tajlandë, po marrin pjesë bukuroshe nga e gjithë bota, ndërkaq njërës ndër to në finalen glamoruze në të cilën do të paraqitet fituesja e trefishtë e shpërblimit Grammy, NE-YO, Miss Universe aktuale, 22-vjeçarja Demi-LeighNel-Peters nga Republika Jugafrikane do t’ia dorëzojë kurorën Miss Universe-s.

Pas garës preliminare, në finale (16 dhjetor (7 PM ET), përzgjidhen nga pesë përfaqësuese nga Evropa, pesë nga Afrika/Azia, pesë nga kontinenti amerikan edhe pesë më të suksesshmet, pavarësisht nga cili kontinent vijnë.

Misse-t tashmë kanë bërë intervistën preliminare me anëtarët e jurisë dhe para-garat në rroba banje dhe në fustane mbrëmjeje.

Në këtë garë Zana Berisha ka shkuar plotësisht e përgatitur dhe e përqendruar. Bukuroshja na ka thënë që konkurrenca është jashtëzakonisht e fortë dhe që vajzat janë shumë të bukura, të arsimuara, fotogjene dhe shumë komunikuese.

“Për mua udhëtimi në këtë destinacion aq të largët dhe ekzotik është përvojë të cilën kurrë nuk do ta harroj, sepse njohja e aq shumë njerëzve dhe vizita e të gjitha atyre vendeve është diçka që duhet vlerësuar dhe mbajtur në mend gjatë gjithë jetës, aq më parë që gara për bukuroshen e botës po vazhdon tashmë 67 vjet.”

“Krahas kënaqësisë së papërshkrueshme që kam rastin të prezantoj shtetin tim në këtë garë më prestigjioze të bukurisë, për mua ky udhëtim paraqet edhe përgjegjësi të madhe”, shprehet Zana për portalin tonë.

Sipas asaj që kemi pasur rastin të shohim në Instagramin e saj, bukuroshja jonë gjen kohë edhe për t’u kënaqur. Zana, edhe një herë tregoi linjën shembullore, ndërkaq ne edhe njëherë i urojmë shumë fat!

/Telegrafi/