Vokrri: Nuk ka përçarje mes klubeve

Kryetari i Federatës së Futbollit të Kosovës (FFK), Fadil Vokrri, ka mohuar të ketë përçarje mes FFK-së e klubeve.

Ai të hënën pas mbledhjes që pati me kryetarët e 12 klubeve të Superligës tha se vullneti është i gjithanshëm për të vazhduar garën me rrjedhë normale.

Në të vërtetë, në mbledhjen e kaluar të mbajtur para pak ditësh Komiteti Ekzekutiv mori vendim që t’ia pranojë dorëheqjen kryetarit të Komisionit të Garave (KG), Isuf Ajeti, dhe atij Disiplinor (KD), Metë Çekut, pas kërkesës së tetë klubeve të Superligës për ndryshim të këtyre dy komisioneve.

"Edhe më herët ne u kemi thënë klubeve që t’i udhëheqin garat, por ato nuk janë shprehur të gatshme. Kështu, Komisionin e Garave deri pas kësaj xhiroje që zhvillohet në mesjavë do ta udhëheq Agim Maloku, ndërsa atë Disiplinor Luan Vokshi", ka thënë Vokrri.

Kryetari i klubit Trepça ’89, Abedin Zeka, ka thënë se klubet kanë hasur në mirëkuptimin e kryetarit të FFK-së, Fadil Vokrri, për kërkesën e tyre, shkruan gazeta Koha Ditore.

"Ka qenë një bisedë shumë e qetë dhe efektive, pasi atë që e kemi kërkuar është bërë. Të dy kryetarët janë larguar dhe të enjten do të emërohen dy kryetarë të rinj, të cilët presim të jenë të pranueshëm për klubet. Ne kemi kërkuar nga kryetari Vokrri t’i emërojnë dy persona që ia duan të mirën futbollit dhe kemi hasur në mirëkuptim. Në këtë mbledhje nuk morën pjesë vetëm zyrtarët e Drenicës, Ferronikelit e Besës", ka thënë Zeka.

Klubet kishin kërkuar ndërrimin e anëtarëve të këtyre dy komisioneve me arsyetimin se po përdorin kritere të dyfishta dhe për këtë kishin dhënë edhe ultimatum se nuk do t’i vazhdojnë garat nëse nuk u përmbushet kërkesa. Por, për t’ia bërë më të lehtë punën KE të FFK-së, dy kryetarët e dy komisioneve dhanë dorëheqjen dhe kjo u pa si kompromis mes Federatës që u shpreh se nuk do të pranojë ultimatume dhe klubeve që kërkuan ndryshim të tërësishëm të këtyre dy komisioneve. /Telegrafi/