Visar Kelmendi shpërblehet nga Universiteti i Sheffield-it

Themeluesi i Korporatës Rugove, Visar Kelmendi, të shtunën në ceremoninë e diplomimit të Universitetit të Sheffield-it, City College, në Greqi, pranoi “Çmimin e Gjeneratës së shquar’’, të cilin e ndan ky universitet.

Sipas komunikatës për media, të lëshuar nga Universiteti i Sheffied-it, Fakulteti Ndërkombëtar City College në Greqi, Kelmendi u shpërblye me këtë çmim, si rezultat i kontributit dhe suksesit të tij në biznes, në Kosovë, pas studimeve MBA në këtë universitet.

Në fjalimin e tij përshëndetës, pas marrjes së çmimit, Kelmendi përveç tjerash tha: “Të gjithë ne kemi një gjë të përbashkët, të gjithë ne besojmë se mund të përmirësojmë jetën tonë dhe të shoqërisë ku jetojmë, për ta bërë botën një vend më të mirë për të ëndërruar dhe jetuar në të”.

Gjatë kësaj ceremonie u shpërblyen gjithsej 6 studentë, nga vende të ndryshme në Ballkan, të cilët sot drejtojnë biznese të ndryshme në vendet e tyre, ku nga Kosova u përzgjodh Kelmendi.

Këto çmime u ndanë nga zëvendës kancelari i Universitetit të Sheffield-it, Profesor Sir Keith Burnett.

Sipas tij, të diplomuarit në këtë universitet, bartin emrin e mirë të universitetit, në karrierat dhe të ardhmen e tyre.

Në këtë ceremoni ishin të pranishëm më shume se 200 studentë nga 20 shtete te ndryshme, si dhe njerëz me rëndësi të fushën e ekonomisë, politikës e artit në vendet e tyre. /Telegrafi/