Vetëm tre meçe të fituara në evropian

Ekipi përfaqësues i Kosovës në pingpong, në të dy konkurrencat, edhe një herë ka dështuar të ketë paraqitje të mira në garat ndërkombëtare. Në kampionatin evropian të mbajtur në Austri - Divisoni Standard, përfaqësuesja kosovare ka fituar vetëm 3 meçe nga 30 sa i ka zhvilluar gjithsej.

Në konkurrencën e meshkujve, Kosova ka garuar në kuadër të Grupit B, së bashku me Lituaninë, Norvegjinë, Irlandën, Qipron dhe Estoninë dhe që të gjitha meçet ndaj këtyre rivalëve i kanë humbur, duke u radhitur si të fundit në grup. Besart Domaniku, përndryshe edhe selektor i Kosovës e ka shënuar fitoren e vetme ndër meshkuj ndaj Estonisë.

Përfaqësuesja e femrave ndërkohë në kuadër të Grupit B ka pasur punë me Zvicrën, Azerbajxhanin, Estoninë dhe Skocinë. Garat në këtë grup kosovaret i kanë mbyllur gjithashtu si të fundit, me dy meçe të fituara, edhe atë nga Vlona Maloku në takim me Azerbeixhanin.

Përsëri për shkak të mosmarrëveshjeve ndërmjet lojtarëve më të mirë kosovarë dhe Federatës së Pingpongut të Kosovës në ekipin përfaqësues kanë munguar lojtarët dhe lojtaret më të mira. Kjo është hera e katërt që ata mungojnë në garat evropiane dhe botërore. /Zëri/Telegrafi/