Universitet, shpallen fituesit e formularit A3

Ministria e Arsimit bëri publike të shtunën listën me 2847 emrat e studentëve të rinj që aplikuan me formularin A3.

Në dispozicion për këtë fazë ishin vënë plot 3604 kuota të paplotësuara, prej të cilave 757 nuk janë kërkuar fare nga kandidatët.

Deri ditën e premte, fituesit duhet të regjistrohen pranë fakulteteve duke paraqitur diplomën e maturës shtetërore dhe listën e notave, fotokopje të një dokumenti identifikimi, dy fotografi dhe mandat i arkëtuar i tarifës së regjistrimit në zyrat e Postës Shqiptare prej 1550 lekësh për llogari të universitetit ku është shpallur fitues, raportoi e përditshmja Panorama.

Të vetmet kuota që konsiderohen të djegura janë ato të Universitetit të Tiranës, ku kanë mbetur rreth 60 të tilla, në degët elitare. Pavarësisht kundërshtimeve të krerëve të UT-së, MASH e ka marrë vendimin për shkak se zbritja e vijës do të tejzgjaste procesin e pranimeve, ndërkohë që viti akademik ka dy javë që ka nisur.

Ndërkohë, më 5 nëntor do të shpallen fituesit e sistemit part-time, ku do t’u jepet prioritet kandidatëve që nuk kanë një shkollë të lartë, ndërsa ata që e kanë kryer një shkollë të lartë do të zënë vetëm 20% të kuotave të pranimit. /Telegrafi/