Trumat ortopedike, shtohen rastet nga ngricat në Spitalin Amerikan!

Bora ditët të fundit në Kosovë ka mbuluar vendin ndërsa rrugët janë bërë edhe më të rrezikshme për shkak të akullit. Si rrjedhojë gjithnjë e më shumë në Spitalin Amerikan po shtohen rastet e pacientëve që kanë nevojë për përkujdesje dhe ndërhyrjen e specialistëve për shkak të lëndimeve që marrin kur rrëzohen.

“Atëhere për sa i përket klimës së ftohtë që po kalojmë, mund të them se këto dy apo tre javët e fundit gjatë rënies së dëborës dhe ngricave janë shtuar rastet e të lënduarve, kryesisht fëmijë dhe moshat rreth 60 vjec, të cilët janë paraqitur me trauma të ndryshme. Kjo është një situatë pothuajse normale për kohën që po kalojmë, ndaj këshilla më e mirë është që të evitojmë lëvizjet e panevojshme për të zvogëluar edhe mundësitë për lëndime” – tha Dr. Florin Ramadani, Kirurg Ortoped në Spitalin Amerikan.
Në fakt bora dhe ngrica janë faktorët kryesor për trauma ortopedike gjatë sezonit të dimrit dhe është e rëndësishme që të jeni të vëmendshëm kur ecni apo edhe kur vozisni veturën.
Trauma ortopedike mbulon spektrin e frakturave, të cilët mund të jenë të thjeshta, të izoluara apo edhe të rrezikshme për shkak të aksidenteve apo incidenteve që mund të na ndodhin gjatë ditëve me ngrica.

Si mund ti shmangim rrëzimet nga ngricat përmes disa teknikave?
“Fillimisht është shumë e rëndësishme që këpucët tuaja të jenë prej gome. Mbajta e këpucëve me taka nga gratë shton rrezikun duke favorizuar rrëshqitjet. Mënyra se si ecim në një sipërfaqe me akull luan një rol të veçantë. Ajo që këshillohet është e thjeshtë, imitoni pinguinët. Pra hapi juaj të jetë sa gjerësia e legenit. Teknika e të ecurit prej pinguini kërkon që peshën e trupit tuaj ta përqendroni në këmbën që hidhni përpara. Ndodh që ju të rrëzoheni, nëse pesha e trupit tuaj përqëndrohet, ashtu si rëndom kur ecim normalisht, në mes të këmbëve tona. Këshillohet po ashtu që trupi të jetë i lirë, pa pesha”

Trauma ortopedike është një degë e kirurgjisë ortopedike e specializuar në problemet që lidhen me eshtrat, nyjet, dhe indet e buta (muskujt, ligamentet etj). Qëllimi kryesor i kësaj zone të specializuar në ortopedi është shërimi i kockave, si dhe rivendosjen e shtrirjes anatomike të sipërfaqeve të përbashkëta për të lejuar shërimin dhe rikthimin funksion të pjesës së dëmtuar të trupit.

Mjekët tanë ortopedë kanë një përvojë shumë të gjatë në rindërtimin e thyerjeve dhe shumë ndërhyrjeve të tjera ortopedike si dhe përdorin teknikat më të avancuara në kirurgji, përfshirë kirurgjinë minimalisht invazive dhe fiksimit të përparuar të jashtëm.
Në Spitalin Amerikan ju do të gjeni të gjithë përkujdesjen e duhur dhe ndërhyrjen e menjëhershme 24h/7 ditë.

Spitali Amerikan, përqafoje jetën!