Trepça i rikthehet fitoreve

Trepça ka arritur ta fitojë ndeshjen në Riza Lushta kundër Vëllaznimit me rezultat 2-0, në kuadër të javës së 25-të të Raiffeisen Superligës së Kosovës në futboll.

Padyshim se gjatë pjesës së parë Trepça ishte dukshëm më e mirë, pasi pati disa raste për të shënuar, por portier i Vëllaznimit, Altik Muhaxhiri, bëri disa pritje të mira.

Ndeshja e dytë ishte shumë më interesante dhe më dinamike se e para. Të dyja skuadrat patën rastet e tyre por vetëm vendasit arritën të shënojnë.

Në minutën e 81-të ishte Xhevdet Mulliqi ai që e hapi rezultatin për vendasit, duke shënuar golin e parë të tij për Trepçën. Rezultatin përfundimtar e vendosi Enis Zabërgja pas një solo aksioni nga afërsia, duke shënuar kështu golin e tij të nëntë këtë edicion.

Trepça me këtë fitore është ngritur në pozitën e katërt me 37 pikë, ndërsa Vëllaznimi mbetet në pozitën e parafundit në tabelë me 22 pikë.

Nesër zhvillohen edhe këto ndeshje:

E diel, 21.04.2013, nga ora 13:00:
Prishtina – Drenica (SSK)
Trepça ’89 – Llamkos Kosova (SSK)

E diel, 21.04.2013, nga ora 15:00:
Besa – Hysi
Drita – Liria
Ferronikeli – Hajvalia.

/Telegrafi/