Të shtunën arrijnë vaksinat e para kundër gripit A/H1N1

Grupi punues për menaxhimin e pandemisë së gripit të ri A/H1N1, i kryesuar nga zëvendësministrja e Shëndetësisë, Mybera Mustafa, të premten ka mbajtur një takim pune, në të cilin janë analizuar masat e ndërmarra deri më tani lidhur me menaxhimin e situatës rreth gripit në Kosovë.

Zëvendësministrja Mustafa dhe U. D. i Sekretarit permanent të Ministrisë së Shëndetësisë, Haxhi Kamberi, kanë folur për masat që ka ndërmarrë ministria duke siguruar furnizim të qëndrueshëm të institucioneve shëndetësore me barna dhe material shpenzues, medikamentin Tamiflu, si dhe është njoftuar se nesër në Kosovë, arrijnë vaksinat e para kundër gripit A/H1N1, donacion prej 5.000 dozave, të cilat Ministria e Shëndetësisë e Turqisë, i ka dhuruar donacion për Kosovën, me kërkesë të ministrit të Shëndetësisë të Kosovës, Alush Gashi.

Në takim, u tha se IKSHP ka planin e vaksinimit dhe me këto vaksina së pari do të vaksinohen punonjësit shëndetësor, sipas kategorizimit të kategorive prioritare, derisa ministria ka krijuar kushte që medikamenti Tamiflu dhe vaksinat kundër gripit sezonal të jepen edhe përmes sektorit privat nën mbikëqyrjen e MSH-së.

Drejtori i IKSHP-së Naser Ramadani ka raportuar për situatën epidemiologjike në Kosovë dhe ka konfirmuar se deri më sot, në Kosovë janë regjistruar 77 raste të Gripit A H1N1, shumica prej të cilave raste e kanë kaluar lehtësisht gripin, me përjashtim të një rasti që ka përfunduar me vdekje. /Telegrafi/