“Talebanët po vijnë”: Pamje prekëse që tregojnë gratë afgane duke i lutur ushtarët amerikanë për ndihmë, përmes ‘gardhit’ të aeroportit të Kabulit

Ulërimat e panikut të përziera me zhurmën e armëve ishin në aeroportin e Kabulit në mes të kaosit të ri, ndërsa mijëra afganë të dëshpëruar për të shpëtuar nga sundimi i talebanëve iu lutën trupave që të lejoheshin në aeroplanët e vetëm që po shkonin jashtë vendit.

Sipas mediave të huaja, përcjell Telegrafi, disa gra janë filmuar duke “ngritur duart” përmes kangjellave të hekurta drejt trupave amerikane ndërsa bërtisnin ‘talebanët po vijnë’ në pamjet që qarkullojnë në llogaritë afgane të mediave sociale këtë mëngjes.

Lexo po ashtu Dalin pamje të tjera, të bëra nga aeroplani – tregojnë një burrë afgan ‘të kapur për rrotë’, derisa fluturakja ishte në ajër

Ndërkohë më shumë pamje kapën të shtëna armësh që binin mes turmave në portën veriore të aeroportit gjatë natës dhe këtë mëngjes ndërsa burra, gra dhe fëmijë u grumbulluan pranë tij.

Siç vë në pah DailyMail, personat e armatosur talebanë tani kanë rrethuar aeroportin – e vetmja rrugë jashtë Afganistanit për mijëra refugjatë të bllokuar në kryeqytet dhe provincat e afërta – dhe po kontrollojnë dokumentet e atyre që përpiqen të arrijnë në të.

Kjo do të thotë se përkthyesit afganë dhe të tjerët që mbajnë viza që do t’i lejonin ata në fluturimet e evakuimit, janë fshehur pranë aeroportit, të frikësuar dhe duke u përpjekur të arrijnë në pistë.

Lexo po ashtu Zëdhënësi i talebanëve telefonon gazetaren e BBC-së derisa ajo ishte në transmetim të drejtpërdrejtë - ja çfarë thotë ai

Për të parë se sa e rëndë është bërë situata, zëdhënësja e Shtëpisë së Bardhë, Jen Psaki, u detyrua të pranojë të martën se nuk ka asnjë garanci që të gjithë qytetarët amerikanë dhe mbajtësit e vizave do të jenë në gjendje të largohen nga vendi para se trupat të tërhiqen më 31 gusht.

Fluturimet që supozoheshin të transportonin mijëra njerëz jashtë vendit çdo ditë deri më tani kanë nisur me vetëm disa qindra në bord, me Britaninë e Madhe duke evakuuar rreth 370 persona nga e diela deri të hënën.

Gjeneral Sir Nick Carter, kreu i forcave të armatosura të Mbretërisë së Bashkuar, i tha BBC Radio 4 se Britania ‘shpreson’ të nxjerrë 1.000 njerëz sot me shtatë fluturime evakuimi – megjithëse u detyrua të pranojë se kjo është e mundur vetëm me ‘bashkëpunim’ me talebanët. /Telegrafi/