Suedia e akuzon Liridon Lecin për trukime (Video)

Në tetor të vitit të kaluar, Liridon Leci ishte pezulluar nga skuadra, Landskrona, për shkak se dyshohej për trukim të ndeshjeve në kampionatin suedez.

Një vit më pas, në Suedi sërish lakohet emri i mbrojtësit, në një kronikë të televizionit publik suedez, SVT.

Në video promon për reportazhin e realizuar nga ekipi I emisionit “Updrag gransknings”, të cilën e posedon KTV-ja, Leci shihet duke biseduar me gazetarin suedez, i cili i është prezantuar mbrojtësit kosovar si një biznesmen dhe që kërkon bashkëpunimin e tij për të trukuar ndeshje në Suedi.

Gazetari suedez, Vin Ornlunden, që e ka shkruar raportin edhe në gjuhën shqipe, tregoi për KTV-në se kronika e plotë, të cilën e ka përgatitur bashkë me kolegun Magnus Svenungsson, në STV do të emetohet të mërkurën mbrëma në emisionin “Uppdrag gransknings”, dhe ditëve në vijim, KTV-ja do t’u sjell pjesë të tjera të reportazhit.

Kohavisioni ka kontaktuar me Liridon Lecin, por futbollisti nuk pranoj të prononcohet për këtë çështje.

Leci, që në vitin 2013 ishte pjesë e Landskronës në rangun e dytë të futbollit suedez, është kthyer në Kosovë këtë vit, fillimisht te Prishtina, ndërkaq tani është pjesë e Hajvalisë. /Koha/Telegrafi/