Stinori te dera, “xehetarët” ende në gjumë

Nuk është as hija e Trepçës së para disa viteve, kur ajo gjithçka bënte e para në basketbollin kosovar. Mungesa e palestrës dhe buxheti i ulët për të sjellë përforcime nga jashtë, janë vetëm disa nga brengat e ekipit mitrovicas para fillimit të sezonit të ri, që është paraparë për 5 tetor.

Kanë mbetur më pak se një javë e “xehetarët” ende nuk kanë arritur të kompozohen sa duhet si ekip, edhe pse përgatitjet kanë filluar me kohë. Përforcimi i parë i kësaj vere për mitrovicasit ishte trajneri spanjoll Israel Martin, i cili ka sjellë një frymë të re në ekip dhe duket mjaft ambicioz, por jo edhe atë që e presin nga të gjithë prej Trepçës. “Momentalisht jemi të kënaqur me punën e trajnerit duke pasur parasysh fondin e lojtarëve që ka Trepça. Kemi disa mungesa në ekip, por jemi në bisedime me disa lojtarë të huaj të cilët pritet të mbushin boshllëkun në ekip”, ka thënë për “Zërin”, Shaban Baksi, anëtar i kryesisë së KB Trepçës.

Trajneri spanjoll Martin ka deklaruar se ekipi ende nuk është i kompletuar sa duhet dhe sytë i ka kthyer kah përforcimet e reja, të cilët sadopak do të ndryshonin kuadrin e lojtarëve. “Ekipi nuk është i kompletuar, por po punojmë mjaft. Po pres të përmirësohemi ende”, tha spanjolli. “Kemi vetëm një lojtar të huaj, por jemi në bisedime edhe me disa të tjerë. Nuk dëshirojmë të ngutemi ngase duke pasur parasysh buxhetin jo të lartë të ekipit, nuk duam të gabojmë në zgjedhje. Duam t’i bëjmë përforcimet e duhura të cilat do të luajnë gjatë gjithë stinorit dhe jo të vijnë për 10-15 ditë e më pas t’i largojmë se nuk po i plotësojnë kërkesat tona. Dua te kem një ekip që do të synojë fitoren në secilën ndeshje”, tha Martin.

Optimistë janë edhe vetë lojtarët. Njëri ndër basketbollistët më të mirë mitrovicas ndër vite, Gazmend Asllani, ka thënë se gjithë janë duke u angazhuar që stinori i sivjetmë të jetë më i mirë se ai i kaluari. “Për momentin gjithçka është duke shkuar mirë, edhe pse nuk jemi ende të kompletuar. Kemi pasur dy ndeshje përgatitore dhe jemi mjaft të kënaqur me lojën. Duke pasur parasysh mungesën e palestrës nuk kemi synime të larta. Objektivi ynë është që të futemi në play-off dhe pastaj nëse na jepet rasti pse jo të luftojmë edhe për titull”, tha Asllani.

“Na duhet kohë të krijojmë një ekip konkurrues dhe duhet pritur të shohim se çfarë do ta kemi deri në fillim të stinorit. Aktualisht kemi vetëm një lojtar të huaj, por besoj se do të ketë edhe 1 ose 2 të tjerë, deri në fund të javës kur fillon kampionati”, shtoi Asllani. Trepça as këtë vit nuk do të mund t’i zhvillojë ndeshjet si vendas në palestrën “Minatori” për shkak se punimet janë duke vazhduar dhe pritet të përfundojnë në mars të vitit të ardhshëm. /Zëri/Telegrafi/