Spektatori flet në celular, aktori ndërpret shfaqjen

Shfaqja që shënoi rikthimin pas shumë vitesh në skenën shqiptare të aktorit të njohur Herion Mustafaraj, solli ilaritet, jo vetëm për faktin që bëhej fjalë për një komedi.

“Rikonstruksioni i çiftit” është i zhanrit të komedisë, por në fakt komedia ndodhi në sallë jashtë skenarit në teatër.

Shfaqja është ndërprerë për shkak se njërit prej spektatorëve i binte në vijimësi celulari duke nervozuar aktorin Mustafaraj.

Herën e parë Mustafaraj ndërpreu aktrimin, u kthye nga spektatori dhe pa gjatë në drejtim të tij, duke pritur derisa ai mbaroi bisedën. Herën e dytë, siç shkruajnë shekulli.al, Mustafaraj ka ndërprerë aktrimin dhe këtë herë i ka folur spektatorit në mënyrë të drejtpërdrejtë nga skena në sallë.

Aktori dhe spektatori njiheshin, kjo pasi Mustafaraj iu drejtua me emër: “Ilir të lutem, të lutem, më lini të vazhdoj shfaqjen”. Mësohet se spektatori ishte drejtues i një OJF-je me fokus jetimët, i cili shkeli dy rregullat e teatrit, duke mos fikur celularin dhe duke folur gjatë shfaqjes.

“Rikonstruksionin e çiftit” Mustafaraj e sillte si një vazhdim për filmin “Rikonstruksioni”, ku ishte protagonist 27 vite më parë. Mustafaraj njihet në rolin e Benit, në filmin “Beni ecën vetë”.