Sindikatat e Postës kërkojnë nga Qeveria dhe Kuvendi shkarkimin e Komisionit të Konkurrencës

Sindikatat e Postës së Kosovës (SPK) e kundërshton vendimin e Autoritetit Kosovar te Konkurrencës drejtuar MPB-së dhe disa komunave të cilave u kërkon që të shkëpusin marrëveshjet me Postën e Kosovës.

Në komunikatën e SPK, thuhet se përmes këtyre marrëveshjeve të ligjshme Posta u ka mundësuar qytetarëve që të kryejnë pagesat brenda objekteve të këtyre institucioneve.

“Punëtorët e Postës i bëjnë thirrje MPB-së, komunës së Prishtinës, Gjilanit, Mitrovicës dhe Ferizajt që në asnjë mënyrë të mos zbatojnë vendimin e paligjshëm të Komisionit të Autoritetit Kosovar te Konkurrencës. Nga MPB dhe tri komunat kërkojmë që të presin vendimin e Gjykatës për këtë çështje, por edhe të institucioneve që kanë emëruar anëtarët e këtij Komisioni, Qeveria dhe Kuvendi i Republikës së Kosovës”, thuhet në komunikatë, transmeton Telegrafi.

“Vendimin e këtij Komisioni e kanë kundërshtuar dhe kanë votuar kundër tij dy nga gjithsejtë pesë anëtarët e Komisionit, përfshirë edhe zëvendëskryetarin”.

“Punëtorët e Postës së Kosovës kërkojnë nga Kryeministri i Qeverisë së Kosovës, Z. Isa Mustafa që të iniciojë në Kuvendin e Kosovës shkarkimin e menjëhershëm të Komisionit të Autoritetit Kosovar të Konkurrencës për shkak se ka shkelur Ligjin mbi Mbrojtjen e Konkurrencës 03/L-229 dhe ligje të tjera”.

Më tej në komunikatë thuhet se “Vendimi i Komisionit të Konkurrencës ka rrezikuar edhe mirëqenien sociale të mbi 1000 punëtorëve të Postës. Ky vendim favorizon vetëm grupe të interesit që operojnë në sektorin privat”.

“Sindikatat e Postes se Kosovës njofton të gjitha institucionet si dhe opinionin publik se nuk do të ndalet deri në vendosjen e ligjshmërisë dhe nxjerrjen para organeve të drejtësisë të Komisionit të Konkurrencës. Për hapat e ardhshëm sindikal do të ju njoftojmë publikisht”, thuhet në kumtesën e SPK. /Telegrafi/