Sigal Prishtina mposhti edhe Lirinë

Sigal Prishtina mbetet skuadra e vetme që nuk ka pësuar humbja pas dy ditëve të turneut të basketbollit që po mbahet në kryeqytet. Pasi më parë kishte mposhtur skuadrën turke Aliaga Pekim, prishtinasit mbrëmë mundën skuadrën nga Maqedonia, Lira me rezultat 83:74.

Përkundër fitores, të zgjedhurit e Ceyhun Cabadak nuk kanë shkëlqyer dhe deri te fitorja nuk kanë arritur lehtë, ndonëse në dy çerekët e fundit e dërrmuan rivalin. Në fakt, çereku i parë nisi me lojë të mirë të Sigal Prishtinës, e cila prore ishte në epërsi, por nga fundi basketbollistët e Lirisë u këndellën dhe në saje të Simiqit barazuan rezultatin 19:19.

Edhe në çerekun e dytë nuk pati shumë dallim në lojën e Sigal Prishtinës, por që epërsia u shtua në pesë pikë dallim 43:38 dhe këtë në saje të disa pikëve radhazi të Blerim Mazrekajt nga gjuajtjet e lira. Në fillim të çerekut të tretë, mysafirët barazuan rezultatin në 46:46, por prishtinasit përmes Kieza, Waller e Berishës rikthyen epërsinë, madje e shtuan atë në dhjetë pikë, 64:54.

Paraqitjen më të mirë basketbollistët e Sigal Prishtinës e patën në fillim të çerekut të fundit, kur Waller ishte i pandalshëm dhe epërsi arriti edhe në 15 pikë dallim, por nga fundi prishtinasit u vetëkënaqën e këtë e shfrytëzuan basketbollistët e Lirisë, të cilët përmes Gjurishiç e Karakolev zbutën epërsinë në vetëm 9 pikë, kështu që në fund shifrat në semafor tregonin për fitoren e Sigal Prishtinës me rezultat 83:74.
Në ndeshjen tjetër të ditës së dytë Aliaga Pekim ka mposhtur Trabzonsporin me rezultat 70:64. Fituesi i turneut varet nga ndeshjet e sotme e të fundit të turneut në të cilat takohen Aliaga Pekim – Liria (17:45) dhe Sigal Prishtina – Trabzonspor (20:00). /Zëri/Telegrafi/