Si ia panë hairin shuarjes së Hysit skuadrat e Ligës së Parë

Klubet e fundit të tabelës së Ligës së Parë, ia kanë parë hairin shuarjes së klubit të Hysit. Në këtë mënyrë, nga kjo kategori e garave drejtpërdrejt do të largohet vetëm një skuadër (pozita e 16-të), ndërsa vendi i 15-të dhe 14-të do të shkojnë në barazh. I 13-ti, do të shpëtojë pa barazh. Këtë rokadë e ka bërë shuarja e Hysit, e cila pasi që ra nga Superliga s’do të garojë as në Ligën e Parë.

Për këtë çështje foli për Arenën zyrtari i Federatës së Futbollit të Kosovës, Bajram Neziri. “Hysi ka rënë në Ligën e Parë, por meqenëse ai klub nuk ekziston më, vendi i 14-të dhe i 15-të do të shkojnë në barazh, teksa i 16-ti bie direkt në Ligën e Dytë. Pra, pozita e 13-të shpëton pa barazh”, është shprehur ai për gazetën Arena. Kështu, më së shumti hairin po ia sheh Kosova e Prishtinës, e cila ka siguruar pozitën e parafundit në renditje.

Hysi nëse veç vendos t’iu rikthehet garave, atëherë këtë mund ta bëjë nga zeroja, pra nga Liga e Dytë. Llapjanët u tërhoqën nga garat e Superligës për shkak të problemeve të ndryshme, kryesisht me financa. Ata u larguan pak javë pa nisur stinori pranveror i edicionit 2013/2014. /Arena/Telegrafi/