Shtriks: Final-Four do të jetë spektakël i veçantë

Drejtori i Ligës ballkanike flet për organizimin e Final Four që i është ndarë qytetit të Prishtinës.

KB Sigal Prishtina është nikoqire e Final Four 2014 të Eurohold Ligës ballkanike të basketbollit. Finalet do të luhen prej 25 deri më 27 prill.

Drejtori sportiv i BIBL, Mr. Shay Shtriks është shprehur i kënaqur për organizimin që do të bëhet në Pallatin e Rinisë dhe të sporteve në Prishtinë.

“Së pari dua të përgëzoj katër ekipet e kualifikuara. Mendoj se janë katër ekipet më të mirë të stinorit, por në të njëjtën kohë nuk dua të nënçmoj pjesëmarrësit e tjerë, sepse secila skuadër ka mundur të jetë në Final Four. Stinori 2013/14 ishte shumë intensiv, me lojë interesante dhe asgjë të sigurt deri në fund”, tha ai.

“Të gjithë kanë luftuar shumë, por fatkeqësisht janë vetëm 4 vende në Final Four dhe këtë vit ato i kanë zënë ekipet më të mira KB SigalPrishtina, BC Levski Sofia, BC Balkan dhe BC GilboaGalil”.

Shtriks ka falënderuar të gjithë që kanë qenë të angazhuar dhe sponsorët kryesor e mediat partnere, duke potencuar edhe Radio Televizionin e Kosovës (RTK) e RTV21.

“Jemi para Final Four. Jam thellësisht i bindur se sikur gjatë tërë vitit, kur secila ndeshje ishte dramatike deri në fund, katër ndeshjet e fundit do të jenë po ashtu interesante, emocionale dhe me basketboll të nivelit të lartë. Jam i sigurt se Final Four 2014 do të dëshmojë tifozëve dhe adhuruesve të basketbollit lojë të mira dhe do të bëjë ata të jetojnë një spektakël të veçantë të basketbollit”, tha Shtriks. /Sporti1/Telegrafi/