Shoqata Sindikale e Teatrit Kombëtar të Kosovës ngushëllon familjen Kraja

Shoqata Sindikale e Teatrit Kombëtar të Kosovës ka ngushëlluar familjen Kraja, për humbjen e vajzës së tyre, Arzana Kraja.

Në telegram ngushëllimi thuhet se,  Shoqata Sindikale e Teatrit Kombëtar të Kosovës, me dhimbje të thellë e ka marrë lajmin e ndarjes së parakohshme nga jeta, të regjisores së mirënjohur, Arzana Kraja.

“Arzana Kraja ishte sinonim i një vajze të urtë dhe punëtore, që shquhej për talentin dhe kreativitetin e veçantë, të shprehur në mënyrë brilante në krijimtarinë filmike. Arzana Kraja me mjaft sukses i thej kufijtë kombëtar, duke e prezantuar në mënyrë shembullore kinematografinë tonë në botë dhe veçantinë që ne si popull përfaqësojmë. Arzana Kraja do të ngelet në kujtesën tonë si një yll i pashuar, që i jep dritë në vijimësi rrugës drejt shtegëtimit tonë në shtigjet e reja të artit. Më këtë rast, i shprehim ngushëllime familjes Kraja për ndarjen nga bija dhe motra e tyre e dashur dhe gjithë komunitetit artistik, për humbjen e një regjisoreje të spikatur. Lutemi që shpirti i sajë të gjejë prehje në parajsë”, thuhet në telegram.

Lexo po ashtu Vdekja e regjisores Arzana Kraja, Prokuroria urdhëron që trupi të dërgohet për obduksion

Vdekjen e Arzana Krajës e ka konfirmuar Policia e Kosovës.

“Me datën 13.11.2019 rreth orës 09:08 policia ka pranuar një informatë, për një trup të pa jetë në lagjen ‘Kalabria’ në Prishtinë. Njësitë policore kanë dal menjëherë në vendin e ngjarjes, përfshirë edhe ekipin mjekësor të emergjencës të cilët kanë konstatuar vdekjen e personit të gjinisë femërore”, thuhet në njoftimin e policisë.

Ndërsa, lidhur me rastin, Prokuroria Themelore në Prishtinë ka lëshuar urdhëresë që trupi i pajetë të dërgohet për obduksion. /Telegrafi/