Shkarkimi i trajnerëve, joprofesionalizëm

Nëntë ndeshje, 7 trajnerë të larguar. Ky është bilanci i këtij fillimi të kampionatit të Superligës së Kosovës në futboll. Nismë kjo që nuk mbahet mend të ketë ndodhur më parë. Sikur të ishte pranvera, ndoshta do të ishin arsyetuar këto veprime të klubeve, por vjeshta gjithmonë është cilësuar e qetë, andaj është e pakuptim të kemi kaq shumë ndërrime.

Kryetari i Shoqatës së Trajnerëve të Futbollit të Kosovës, Ajet Shosholli dhe trajneri i skuadrës lidere të Superligës, Llamkos Kosovës, Ismet Munishi, këtë dukuri të klubeve e cilësojnë si jo profesionalizëm, joseriozitet dhe pa vizion.

“Është për të ardhur keq. Kjo dëshmon se në çfarë niveli punojmë. Kryesit e klubeve nuk mund të organizojnë si duhet klubin dhe kjo ndikon pastaj edhe në punë e trajnerit. Këto kryesi kanë jo profesionalizëm dhe suksesin gjithmonë ia dedikojnë vetës, ndërsa mossuksesin e kërkojnë tek trajnerët”, tha Munishi, duke shtuar se këto ndërrime nuk i bëjnë mirë futbollit, madje sipas tij edhe pse trajnerët po ndërrohen rezultatet nuk po shihen.

Edhe trajneri i mirënjohur, Ajet Shosholli e dënon këtë veprim të klubeve.

”Me vjen mirë që mu dha rasti të flas për këtë temë e cila është vërtet shqetësuese. Klubet tona po thirren në profesionalizëm, por me këto veprime ata tregojnë një joprofesionalizëm tipik. Për nënën ndeshje të ndërrohen kaq shumë trajner është e papranueshme. Klubet tona nuk kanë vizion ,ato punojnë aty për aty. Asnjë trajner në botë nuk mund të bëjë ndryshime për 8-9 ndeshje siç kërkojnë këto klube. Kjo që po ndodh është për të ardhur keq, por e tregon joprofesionalizmin që punohet nëpër disa klube”, tha Shosholli.

Të rikujtojmë se i fundit që u largua nga posti i trajnerit, është Arbnor Morina nga Ferroinikeli, më herët punën me trajnerët e tyre e kishin ndërprere, Trepça (Rafet Prekazin), Trepça’89 (Gani Sejdiun), Drenica (Fadil Rama), Hajvalia (Bekim Isufi), Drita (Musa Selimi) dhe Fushë Kosova me Zylkyfli Obërtincën i cili veçse ka lajmëruar dorëheqjen. /Zëri/Telegrafi/