Senati Amerikan aprovon kandidaturën e David Kostelancik, si ambasador i ri i SHBA-së në Shqipëri

Senati amerikan miratoi të premten kandidaturën e diplomatit të karrierës, David Kostelancik për postin e ambasadorit të ri të Shteteve të Bashkuara të Amerikës në Shqipëri, njoftohet në faqen e tij në internet.

Kostelancik ishte propozuar nga Presidenti amerikan, Joe Biden për të zëvendësuar ambasadoren aktuale, Yuri Kim.

Kostelancik ka një karrierë të gjatë në diplomaci.

Në të kaluarën në vitet 1992-94 ai ka punuar edhe në ambasadën amerikane në Tiranë.

Shefi i ri i ambasadës amerikane në Tiranë ka qenë edhe Drejtori i Zyrës për Çështjet e Evropës Jugore Qendrore dhe Drejtori i Zyrës për Çështjet Ruse, në Byronë e Çështjeve Evropiane dhe Euroaziatike, si dhe Drejtor i Zyrës së Evropës dhe Azisë në Byronë Ndërkombëtare të Narkotikëve dhe Ligjit.

Aktualisht Kostelancik mban detyrën e këshilltarit të stafit ushtarak në Pentagon.

Nga jetëshkrimi i tij mësohet se ai flet shqip, rusisht, hungarisht dhe turqisht.

Me rastin e promovimit të kandidaturës së tij si ambasador në Tiranë, Kostelancik deklaroi se lufta kundër korrupsionit në vendet e rajonit të Ballkanit Perëndimor është përparësi e SHBA-së.  Ai ka theksuar se  do të vazhdojë punën me shqiptarët për të forcuar demokracinë dhe drejtësinë në  institucione, do të  ndërtojë mbrojtjen mbi partneritetin dypalëshe dhe në NATO dhe do të vazhdojë të forcojë klimën e biznesit në Shqipëri.