Sekuestrohet municion dhe armë në Sevçe të Shtërpcës

Drejtoria për Hetimin e Krimit të Organizuar në bashkëpunim të ngushtë me Drejtorinë Rajonale të Ferizajt, gjatë orëve të mbrëmjes të së hënën, ka zhvilluar një operacion kontrolli ne fshatin Sevçe të Komunës së Shtërpcës, ku është gjetur dhe sekuestruar sasi e madhe municioni dhe armëve.

Sipas raportit të policisë, është sekuestruar një mitraloz kundërajror – komplet me të gjitha pajisjet përcjellëse të kalibrit 20 milimetra, një minahedhës – komplet me të gjitha pajisjet përcjellëse, të kalibrit 60 milimetra, 260 copë municioni për mitraloz kundërajror, 33 copë predha për minahedhës.

I gjithë armatimi dhe municioni janë prodhim jugosllav, ndërsa i tërë ky municion i llojeve të ndryshme dhe armët janë gjetur në një objekt të pabanuar – mulli të ujit jofunksional.

Gjate operacionit ka pasur reagime të banorëve serbë të fshatit në shenjë pakënaqësie lidhur me zhvillimin e operacionit policor, mirëpo situata është menaxhuar mirë dhe nuk ka pasur ndonjë incident.

Operacioni është mbështetur gjate gjithë kohës nga Njësitë Speciale Operative, Njësia për Mbrojtje nga Eksplozivet dhe Njësiti i Krim-teknikes. /Telegrafi/