Rrushi të shpëton nga kanceri

Shkencëtarët pohojnë se nga të gjitha lëngjet e frutave, lëngu i rrushit është më efikasi kundër kancerit dhe sëmundjeve të zemrës. Kjo, sepse në këtë lëng ka një përqendrim shumë të madh antioksidantësh, të cilët neutralizojnë "radikalet e lira" që janë shkaktarët e plakjes dhe lindjes së sëmundjeve kanceroze.

Rrushi është shumë i pasur me glukozë, fruktozë, acide organike, kripëra minerale, kalium, kalcium, natrium, magnezium, pektinë dhe vitamina. Pikërisht për këtë arsye, mjekët e rekomandojnë në rastet e anemive dhe çrregullimeve të sistemit nervor, në stadet fillestare të tuberkulozit, si dhe në shumë sëmundje të stomakut dhe zorrëve. Vitin e kaluar, shkencëtarët bënë edhe një zbulim tjetër shumë të rëndësishëm: Ata që pinë lëng rrushi të paktën tri here në javë, kanë më shumë shanse për t’i shpëtuar sëmundjes së Alzhejmerit. Vlerat e lëngut të rrushit, shkencëtarët i kanë zbuluar në mënyrë eksperimentale.

Bashkëpunëtoret e Institutit Glazgou, për shembull, studiuan 13 lëngje të ndryshme frutash: Të shegës, të qitros, mollës, ananasit, domates, si dhe disa kombinacione midis tyre. Lëngu i rrushit zuri vendin e parë.

Profesori Allan Krozir, udhëheqës i këtyre studimeve, thotë: “Dihej edhe më parë se antioksidantë, në sasi të mëdha, përmban edhe çaji e vera, por dobia e njërit lëng apo e tjetrit varet jo vetëm nga sasia e antikosidantëve, por edhe nga lloji i tyre. Prandaj është mirë që njeriu të hajë të paktën pesë lloje frutash dhe domosdo, nga një gotë lëng rrushi çdo ditë. E vetmja “e metë” e lëngut të rrushit është se ai ka shumë energji: Një litër lëng rrushi krahasohet me 650 gramë mish viçi ose një litër e 700 gramë qumësht… Këtë fakt s’kanë si të mos e mbajnë parasysh ata që shtojnë shumë në peshë”.