Rritet përdorimi i kartonit jeshil, shqiptarët shtojnë daljet jashtë vendit për festa

Numri i shqiptarëve që kanë udhëtuar me automjetet e tyre jashtë kufijve këtë vit, veçanërisht gjatë periudhave festive, ka shënuar rritje mjaft të fortë.

Kartoni Jeshil ose thënë ndryshe policë sigurimi e detyruar për të gjitha automjetet e regjistruara në Republikën e Shqipërisë të cilat udhëtojnë në një nga vendet anëtare, në periudhën janar – nëntor 2024 pati një rritje prej 2.88% të vëllimit të primeve të shkruara bruto duke arritur vlerën e 1.7 miliardëve. Ndërsa numri i kontratave të lidhura u rrit me thuajse 21%, shkruan A2 CNN.

“Le të themi një produkt që shërbehet mirë dhe dëmshpërblehet gjithashtu. Dhe në këtë drejtim dhe shqiptarët që udhëtojnë janë të ndërgjegjësuar”, tha Artur Ribaj, ish-drejtor departamenti i mbikëqyrjes, AMF.

Sigurimi kufitar për automjetet me targa të huaja që qarkullojnë brenda territorit të Shqipërisë, ka pësuar një ulje të ndjeshme në fund të nëntëmujorit. Ky produkt në 11 muaj pati një ulje 10.53% të vëllimit të primeve të shkruara bruto krahasuar me të njëjtën periudhë të një viti më parë. Gjithashtu dhe numri i kontratave, shkruan A2 CNN.

“Në tërësinë e treguesve të produkteve të sigurimit ka një rënie të numri të vet. Kjo vjen si pasojë e marrjes së makinave me qira. Të gjithë turistët që janë duke ardhur më shumë prej linjave ajrore preferojnë të marrin makina me qira”, tha Ribaj.

Tregu i sigurimeve në Shqipëri përgjithësisht është i orientuar tek sigurimet e jo jetës në rreth 92% të tij ndërsa 8% të jetës. Është sigurimi motorik, ai i cili mbizotëron tregun ndërsa sigurimet vullnetare vijuan rritjen e lehtë. /Telegrafi/