Rice në vizitë të papritur në Irak

Sekretarja amerikane e Shtetit, Condoleezza Rice, bëri një vizitë, të panjoftuar më parë, në qytetin irakian të pasur me naftë të Kirkukut.

Rice pritet t’u bëjë thirrje politikanëve lokalë që të arrijnë ripajtimin në Kirkuk, qytet ky etnikisht i përzier në Irakun verior. Ajo ka në plan të takohet më pas me udhëheqësit irakianë në Bagdad.

Vizita e saj përkon me pakësimin e dhunës në Irak dhe me thirrjet e zyrtarëve amerikanë drejtuar udhëheqësve irakianë, që të shfrytëzojnë uljen e dhunës, për të punuar drejt ripajtimit politik.

Qeveria Rajonale Kurde po shqyrton një propozim për shtyrjen e mbajtjes së një referendumi mbi të ardhmen e Kirkukut. Ligjvënësit thanë të hënën se do të jetë e vështirë që referendumi të mbahet deri më 31 dhjetor, siç kërkohet nga kushtetuta irakiane.

Kurdët duan që ky qytet të përfshihet në provincën e tyre autonome, por banorët jo-kurdë janë të shqetësuar se mund të detyrohen të largohen nga qyteti nëse ai vihet nën kontrollin kurd. /VoA/