Rexhaili dhe gjithë të burgosurit tjerë janë absolutisht të pafajshëm

I tërë opinioni shqiptar, e posaçërisht ai në rrethinën e Shkupit dhe të Kumanovës u shtang dhe u shokua me shqiptimin e dënimit ndaj bijve më të mirë të tyre, nga Gjykata maqedonase, edhe atë me burgim të përjetshëm. Çfarë flet kjo?Kjo flet se ky shtet edhe ashtu i brishtë dhe duke u mbajtur me infuzione ndërkombëtare, është duke dëshmuar se i takon epokës së gladiatorëve dhe përbëhet nga mentaliteti i pareformuar shtazarak.

Të dënosh njerëzit e pafajshëm me burgim të përjetshëm, kjo është krim i gjykatave dhe i gjithë atyre përgatitësve të këtij skenari. Vallë a vetëm shqiptarët duhet të dënohen me burgim të përjetshëm, vetëm ata duhet t`i mbushen burgjet, vetëm duke u mbyllur shqiptarët luftohet krimi……

Këtyre gjërave të liga dhe antidemokratike është duke i ndihmuar me ose pa dashje faktori politik shqiptar, pjesëmarrës në qeverinë Gruevski, i cili gjatë kësaj periudhe heshti dhe po hesht në absurditet, duke mos mundur dhe ditur si ti mbrojë qytetarët e vet shqiptarë, ish- pjesëtarët e luftës së vitit 2001 e mbi të gjitha njerëzit e pafajshëm. Rasti i Rexhail Qerimit, si bashkëfshatarë i imi më tronditi personalisht edhe mua, ngase sipas gjithë dëshmitarëve gjatë kohës së vrasjes së policit,ky njeri ka qenë në fshatin e tij me shokë, si dhe nuk ka pasur kurrfarë lidhje me aktin e vrasjes së policit.

Por jo, kjo nuk merret parasysh nga qeveria dhe gjykatat e korruptuara që janë shndërruar sikurse gjykatat serbe të Rankoviçit dhe Millosheviçit, sepse përbrenda saj nuk ka gjykatës, po viça dhe monstrumë, që janë të mpirë nga ideja që burgjet maqedonase t`i mbushin me shqiptarë të pafajshëm.

Rexhail Qerimi me shokë, si dhe shumë të burgosur të tjerë të pafajshëm, ata të Sopotit, të Brodecit,……. e kështu me radhë janë të pafajshëm. Ata nuk janë kriminelë, po njerëz punëtorë, atdhetarë që në momentet kur u thirr kushtrimi i lirisë i`u përgjigjën pa asnjë dyshim. Andaj nga burgjet famëkeqe dëgjojmë kushtrimin e tyre për t`i ndihmuar dhe për t`i liruar nga burgu.

Por, ky kushtrim nuk shkon tek shurdhmemecët, tek injorantët dhe të mjerët, që nuk i`u dëgjua zëri në asnjë moment, nga shkaku se i mbyllen luftëtarët në çdo ditë, ngase ish- luftëtarët nuk mundën të shohin një ditë të bardhë, ngase zonat shqiptare janë të rrezikuar çdo ditë nga aksionet e mundshme policore “për kapje të kriminelëve” nga kriminelët.

Qeveritarët shqiptarë, deputetët e zonave në vend se të braktisin institucionet e këtij shteti të mbrapshtë, ata shkojnë marrin rrogat e tyre, bredhin nëpër kafene dhe restorante, e në anën tjetër duke u shitur patriotë folklorik dënojnë veprimet e qeverisë dhe gjykatave, edhe pse janë vet pjesë e qeverisë dhe të gjykatave.

Në anën tjetër Rexhaili i gjorë dhe shumë Rexhaila të tjerë kalben burgjeve duke mos e ditur për asnjë moment se përse u arrestuan, përse u shpallën fajtorë. Po dihet, ata janë shqiptarë, alibi tjetër edhe ish-luftëtarë, e ata ku e kanë vendin?Në burg, pra. Ja kjo është logjika e mendësisë shtazarake të Gjykatave demokratike, që ndërkombëtarët në çdo kohë i kritikojnë si të korruptuara dhe joefiçiente, qeveritarët i lavdërojnë, qeveritarët shqiptarë i servojnë, ndërsa qytetarët shqiptarë i mallkojnë.

Andaj i nderuar deputet, ministër, zëvendëskryeministër, politikanë, dreq e engjëll, hapni sytë dhe të ndihmojmë Rexhailin dhe gjithë shqiptarët tjerë të pafajshëm që po na kalben burgjeve, që të dalin nga burgjet, sepse ” Kush hesht tani kur duhet të flitet është djall i nemitur”.

Zaten duke heshtur dhe duke simuluar se çdo gjë funksionon si duhet janë duke na ndodhur fatkeqësitë një nga një, në mënyrë serike, mirë të planifikuara dhe realizuara.
Ti o qeveritarë shqiptar, që je veshur me vellon e nuses së braktisur nga burri, zgjohu dhe ngrit zërin e arsyes dhe ndërgjegjes, e mos lejo që bijtë tu më të mirë, atëherë kur më së shumti i duhen familjeve dhe popullit, të qëndrojnë në burgje pa pikë faji.

Ti o qeveritar dhe deputet shqiptar, nëse e ndien veten shqiptar mendo pak për këta të burgosur, si dhe për ata të Sopotit e shumë e shumë të tjerëve, ngase edhe ish-ambasadori amerikan e tha me gojën plot se ata njerëz janë të pafajshëm.

Duke qenë ata njerëz të pafajshëm, edhe këta të tjerët, e edhe ata më herët, edhe Rexhaili, e kështu të gjithë shqiptarët me radhë që mbahen nëpër burgje, janë të pafajshëm. Andaj zgjohu nga kjo letargji e mallkuar e mos hesht, mos u bë i urtë, se ajo dele që bëhet e urtë e hanë ujqit.

Bëhu koshient se këto gjy(ms)kata dhe kjo qe(n)veri janë antishqiptare dhe bile mundohen që edhe gomarin mashkull ta bëjnë me barrë.