Razer Switchblade

Kompania Razer i ka befasuar të gjithë të pranishmit në panairin CES me konceptin inovativ të konzolës së lojërave dhe netbookut të emëruar Switchblade.

Razer në CES ka paraqitur pajisjen Switchblade, një koncept interesant i cili zbulon se kjo kompani ka apetite më të mëdha për zgjerim në tregje tjera veç prodhimit të pajisjeve periferike. Switchblade në fakt është një kombinim në mes të konzolës së lojërave e netbookut, i dizajnuar veçanërisht për të luajtur lojëra.

Pajisja ka ekran 7-inçësh të ndjeshëm në prekje dhe tastierë dukja e tasteve të së cilës i përshtaten çdo loje. Switchblade ka procesor Atom të Intel, mbështetje për USB 3.0 e HDMI si dhe mundësi të lidhjes në rrjetet WiFi e 3G, gjersa sistemi i tij operativ është Windows 7. Ani pse specifikat e tij në shikim të parë nuk premtojnë mundësinë e luajtjes së lojërave që kërkojnë shumë, Windows 7 paraqet fleksibilitet të madh derisa vet Razer thekson se Switchblade është vetëm koncept i cili nuk do të shkojë në prodhim serik.

Megjithatë, në të ardhmen e afërt mund të presim produkte inovative nga Razer të cilat janë të bazuara në konceptin e Switchblade. /Telegrafi/