Rama, Greqisë: Nuk do heshtim më se u mësuat keq duke na nënshtruar

Kryeministri Edi Rama i kujton sërish Greqisë se Shqipëria s’do heshtë për çështjet e mbetura pa zgjidhur mes dy vendeve. Gjatë një bashkëbisedimi me përfaqësues të diasporës, ai tha se problemet mes Tiranës dhe Athinës vijnë për çështje të cilat sipas tij s’mund të anashkalohen. Sipas tij, Greqia ka qenë mësuar që në Tiranë të kishte bashkëbisedues të nënshtruar apo të heshtur.

“Marrëdhëniet me Greqinë janë të një rëndësie të madhe strategjike, jo më kot ka qenë dhe mbetet një linjë e palëvizshme e politikës sonë të jashtme, partneritet strategjik me Greqinë, por nga ana tjetër është po aq e vërtetë që këto marrëdhënie sot kanë nevojë për t’u ngritur në një nivel tjetër duke kapërcyer disa probleme që na shfaqen herë pas here përpara, si pengesa të mbetura të së shkuarës.

Ne jemi angazhuar që ditën e parë për të adresuar çështjet e mbetura. Kemi ngritur një grup të posaçëm dhe kemi ofruar gatishmëri të plotë që së bashku me palën greke të ulemi në tryezë dhe të diskutojmë hapur me shpirt konstruktiv dhe duke parë nga e ardhmja, gjithmonë duke u bazuar në standardet dhe parimet më të mira. Ka filluar një punë e përbashkët, aspak e lehtë dhe jemi shumë shpresëplotë që sidoqoftë do të mund t’i kapërcejmë këto pengesa që s’janë në të mirë të kësaj marrëdhënie të rëndësishme fqinjësore dhe strategjike që kemi me Greqinë.

Nga ana tjetër e kemi bërë të qartë që s’kemi ndërmend të heshtim të bëjmë sikur s’kuptojmë dhe aq më pak t’i nënshtrohemi fakteve të kryera kur vjen puna në këto marrëdhënie.

Për një kohë të gjatë fqinjët tanë u mësuan pak keq që këtu në Tiranë të kishin bashkëbisedues të nënshtruar të heshtur që bënin sikur s’kuptonin kur fjala ka qenë dhe mbetet për çështje që s’mund të anashkalohen dhe s’bëjmë dot sikur s’ekzistojnë.

Janë botërisht të njohura, çdo shqiptar i interesuar për këtë marrëdhënie i dinë se cilat janë çështjet. Mendojmë se për secilën ka zgjidhje në një frymë bashkëpunimi dhe respekti për standardet dhe parimet e familjes sonë të madhe evropiane.

Nga ana tjetër e kemi vënë re herë pas here që çështjet rimarrin një peshë të caktuar dhe bëhen pengesë për arsye që janë të lidhura me situatat politike, debatin e brendshëm, konsumin e brendshëm politik posaçërisht në Athinë.

Me rëndësi është që ne i kemi shtruar të gjitha në tavolinë e kemi bërë të qartë për fqinjët tanë se këto janë çështje që ne s’kemi ndërmend t’i kapërcejmë duke i lënë pas të pazgjidhura. Jemi vullnet plotë për zgjidhjen më të mirë në bazë të parimit të reciprocitetit”, ka thënë Rama.