Rama i dërgoi mesazh të fortë Evropës për vetëbesimin shqiptar… me atlete!

Imagjinata e rrobaqepësisë është trajtë e njohur e kryeministrit të Shqipërisë, Edi Ramës, i cili kishte fituar reputacion si person me stil pasi ishte zgjedhur ministër i Kulturës në vitin 1998.

Vetëm një vit pasi Shqipëria kishte dalë nga një periudhë traumatike, Rama – i gjatë plot 198 centimetra – e kishte prezantuar vetveten në publik me pantallona të gjerë dhe çorape me ngjyra të kuqe e të verdha.

Ai menjëherë kishte fituar interesimin e të rinjve, pjesërisht për shkak të prapavijës së tij si piktor dhe basketbollist, transmeton Telegrafi.

Në veshjet e tij, ai kishte preferuar të përziente ngjyra të forta, duke krijuar stil unik i cili padyshim se e ka ndihmuar atë të ngjitet në shkallët e një politikani.

Si kryetar i Tiranës për 11 vite, personaliteti i tij artistik kishte pasur ndikim të fortë në ndryshimet që i kishte bërë në qytet, ndërtesat e të cilit kishin filluar të njihen anë e mbanë botës për ngjyrat që posedonin.

Belina Budini, studiuese e komunikimit politik, e kishte quajtur stilin e tij “neo-popullist” në librin e saj të vitit 2009, të quajtur “Edi Rama: politikani (pop)ulist star)”, duke thënë se stili e konfirmonte lidershipin e tij në sytë e opinionit publik.

Sidoqoftë, shumica mund të kishin menduar se kryeministri i sapozgjedhur Rama i ka ‘zbutur’ ngjyrat dhe është adoptuar me një stil më modest të veshjes. Por, ai vetëm sa ka arritur në një nivel tjetër!

Për shembull ngjarjen e ditës së mërkurë, duke marrë pjesë në samitin e Ballkanit Perëndimor në Trieste, bashkë me liderë të ndryshëm nga Ballkani dhe BE, Rama e kishte kombinuar kostumin e tij formal me ‘atlete’ të bardha të brendit ‘Addidas’. Ato kishin qenë prezente edhe gjatë takimeve bilaterale me presidentin francez Emmanuel Macron dhe gjatë takimeve tjera me zyrtarë të lartë të BE-së.

Sa i përket kësaj çështjeje, Irena Myzeqari, ligjëruese në Universitetin Evropian të Tiranës, ka treguar për BIRN-in se e sheh stilin tradicional politik të veshjes të Ramës si mërzitës, sepse nuk përçon ndonjë mesazh të ri.

“Studiuesit dhe hulumtuesit e komunikimit mund të hedhin shumë kritika ndaj tij, por kur i referohemi kreativitetin dhe ndjesisë ‘natyrale’ , Rama është i pakrahasueshëm me gjithsecilin”, ka thënë ajo.

Myzeqari beson se Rama është duke përçuar mesazhe politike me veshjen e tij, njëjtë siç kishte bërë ai gjatë kampanjës elektorale të zgjedhjeve të përgjithshme të 25 qershorit në Shqipëri.

“Bluzët e printuara me trëndafila të kuq dhe pantallonat e zinj ishin përçuar një mesazh të thjeshtë: Unë jam i thjesht, unë jam një nga ju, dhe ne jemi në një familje; familje ku dashuria dhe besimi veçse janë të ndërtuara dhe nuk është nevoja për kravata dhe kostume të zeza formale”, ka thënë Myzeqari.

Ajo gjithashtu beson se veshja e tij e thjeshtë në Trieste nuk ishte rezultat i ndonjë zgjedhjeje të rëndomtë, por strategji e menduar mirë, e dizajnuar për të promovuar imazhin e vetëbesimit shqiptar! /Telegrafi/