Qindra njerëz zhvishen lakuriq për të pozuar për një fotografi pranë Detit të Vdekur

Qindra njerëz lakuriq të lyer me bojë të bardhë kanë ecur nëpër një hapësirë të ashpër të shkretëtirës pranë Detit të Vdekur, si pjesë e një projekti më të fundit të fotografisë nga artisti amerikan, Spencer Tunick.

Sipas The Guardian, përcjell Telegrafi, fotografi 54-vjeçar, vizitoi vendin në Izraelin jugor si mysafir i ministrisë së turizmit për të portretizuar për herë të tretë tkurrjen e Detit të Vdekur përmes subjekteve nudo.

Tunick, i veshur me të zeza, mund të shihej të dielën duke qëndruar në çatinë e një automjeti dhe duke lëshuar komanda me një megafon. “Të gjithë bashkoni këmbët tuaja”, thoshte ai. “Duart poshtë”.

“Për mua trupi përfaqëson bukurinë, jetën dhe dashurinë”, tha Tunick, i cili ka bërë disa fotografi nudo në shkallë të gjerë në të gjithë botën.

Studentja e doktoraturës, Anna Kleiman, 26-vjeçe tha se ajo iu bashkua këtij projekti për të sjellë ndërgjegjësimin ndaj krizës mjedisore.

“Duket diçka shumë e natyrshme, sapo t’i hiqni rrobat”, tha ajo. “Ju nuk do të donit t’i vishnit përsëri. Mendoj se kishim vështirësi pak me shkëmbinjtë”, u shpreh ajo. /Telegrafi/