Qeveri se jo mahi

Një shkurti i shumë pritur erdhi, por nuk erdhi ashtu siç priten: mësimdhënësit, policët, punonjësit administrativ, të gjithë ata që u premtuan dhe u manipuluan nga qeveria e vetshkarkuar gjatë fushatës zgjedhore, pas saj dhe deri ne momentin e dhënies së pagave mujore. Ata prapë po manipulohen se do tu rriten rrogat pas një muaji. Kush janë këta njerëz që kanë filluar të luajnë edhe me kafshatën e bukës se qytetarëve, qytetarë që punojnë 30 ditë që fëmijëve të tyre tu sigurojnë një kafshatë bukë.

Qeveria e cila premtoi rritje rrogash, beri rritje shumë të lart, por jo në paga, por në çmime të produkteve, në ato me të nevojshme që nuk jetohet pa to. U dha urdhër që të gjobiten ndërmarrjet, që të gjobiten shoferët, rrugët e Kosovës gjatë muajit janar ishin të stërmbushura me inspektor tatimor, policë trafiku, doganierë dhe kolona të gjata para edh mbas tyre që prisnin të pajiseshin me gjoba. Të hyrat e shtetit u rriten, popullin e varfëruan, bizneset i dëmtuan, dhe për veten e tyre shumë përfituan, përfituan edhe një mandat, që shumë prej tyre mund ta përfundojnë diku tjetër jo ne parlament.

Ç’presim në të ardhmen nga kjo qeveri që pritet të jetë pothuaj se identike me vizione të njëjta dhe nga njerëz te cilët i njohim dhe dimë për aftësitë e tyre udhëheqëse. Njerëz që kanë punuar vetëm për interesat e tyre personale, dhe të shërbyesve të tyre, tani shërbyesit janë rritur në numër andaj duhet punuar me shumë që tu paguhet atyre mundi që dhanë për të arritur prapë në pushtet.

Sindikatat nuk reaguan edhe pse ato janë bashkëpunëtore në këto manipulime, ato se bashku me qeverinë e vetshkarkuar organizuan këtë manipulim me qytetaret. Kur do të ndalen këto mashtrim, kur do të vije dita kur do t’i besojmë qeverisë tonë, kur do të vije dita që të kemi njerëz të ndershëm, të moralshëm, të pakorruptuar, njerëz që punojnë për zhvillimin e vendit, njerëz që e dëshirojnë më shumë atdheun se sa pasurin e tyre të turpshme që e kanë fituar në mënyrat me jo njerëzore.

Qe nga fillimi i vitit 2011, në Kosovë dhe për Kosovën kanë ndodhur vetëm gjëra të turpshme, që kanë shkatërruar imazhin e shqiptarëve: rezolutë e miratuar kundër shqiptareve, zgjedhje qe shkatërruan imazhin, vendime që poshtëruan vendin, nesër do kemi bisedime që do humbim vendin, pasnesër vendime do te shkatërrojnë vendin. Dikur u arsyetonim se jemi vend në tranzicion, me vonë prioritet statusi përfundimtar, edhe me vonë, po sa kemi fituar pavarësinë, e pas pavarësisë do te thonë akoma se kemi bërë pasurinë.

U rritën shumë te hyrat gjatë janarit. Sa u rritën të hyrat në veri të Kosovës, sa kontrabanda u ndalua, sa kriminelë u arrestuan, sa vetura të vjedhura u gjetën, sa shqiptarë u larguan nga ajo pjesë e Kosovës. E kujt është ajo pjesë, kush e kontrollon kush e financon!? Kështu mendoni se bëhet zhvillimi ekonomik!? Kështu mendoni se bëhet rritja e pagave, kështu vjen rendi dhe ligji, kështu ruhet sovraniteti!?