PS komenton raportin e Hammarberg

Deputeti socialist Arben Ahmetaj tha të mërkurën se raporti i komisionerit të Këshillit të Evropës për të Drejtat e Njeriut, Thomas Hammarberg konfirmoi vrasjen e katër shqiptarëve më 21 janar nga plumbat e Gardës Republikane.

“Është ky një krim për të cilin Saliu e Luli, si urdhëruesit e ekzekutorëve të Ziverit, Aleksit, Hekuranit e Faikut duhet, dhe herët a vonë, do të mbajnë përgjegjësi. Raporti konfirmon po ashtu se policia shqiptare nën drejtimin e Sali Berishës dhe Lulëzim Bashës, jo vetëm që u tregua e paaftë, por ushtroi një dhunë të pashoqe, të padëgjuar në Evropën demokratike dhe në shkelje të plotë të të drejtave të njeriut dhe të çdo ligji të këtij vendi”, tha Ahmetaj.

Deputeti socialist tha gjithashtu se raporti konfirmon se 113 të arrestuarve, shumë prej të cilëve të arrestuar më kot edhe pse s’kishin marrë pjesë në demonstratë, nuk u është ofruar asistencë ligjore. Të 19 minorenëve të arrestuar nuk është ofruar psikologu siç e kërkojnë standardet evropiane, tha ai duke shtuar se raporti vëren se të 113 demonstruesit e ndaluar nga policia në orët e pas protestës, janë keqtrajtuar gjatë ndalimit, janë keqtrajtuar gjatë qëndrimit në rajonet e policisë, janë keqtrajtuar gjatë transportit për në qendrat e paraburgimit dhe gjatë qëndrimit në këto qendra.

“Faktet e mbledhura në raport flasin për një realitet të hidhur dhe të rëndë të shkeljes së të drejtave të njeriut. Një realitet i denjë për regjimet autoritare dhe kleptokratike të kësaj bote, por jo për një vend të NATO-s, për një vend në mes të Evropës në vitin 2011 që tenton të trokasë në dyert e Bashkimit Evropian”, tha Ahmetaj. /Telegrafi/