Prishtina ta nisë sezonin e ri me minus 6 pikë?

Për shkak të mos shkuarjes në Vushtrri për ndeshjen e fundit të kampionatit skuadra prishtinase mund të përballet me një dënim me marrje pikësh, por edhe futbollistët e saj.

Drejtuesit e Prishtinës ditë më parë kishin vendosur të mos dërgojnë ekipin në Vushtrri për ndeshjen e fundit kampionale me Llamkos Kosovën, e cila në atë lojë do të shpallej zyrtarisht kampion i Raiffeisen Superligës së Kosovës në futboll.

Zyrtarët e klubit bardhekaltër kishin pohuar në media se kanë telashe financiare dhe po përballene më një bojkotim të lojtarëve, çfarë kishte ndikuar për të mos udhëtuar në Vushtrri. Megjithatë burime të ndryshme brenda klubit kanë folur të kundërtën.

Prishtina për kundër mos paraqitjes së saj ne Vushtrri me ekip, i dërgoi një letër urimi ekipit të Llamkos Kosovës, ndërsa kjo u kuptua në opinion si ironi e drejtuesve të klubit prishtinas.

Në gjithë këtë situatë komisioni disiplinor i Federatës së futbollit të Kosovës ka ngritur këtë çështje, duke kërkuar deklarata nga akterët e klubit prishtinas.

Në Nenin e 50-të të propozicioneve të garave, për raste sikur ky i Prishtinës, thuhet “Në qoftë se ekipi nuk paraqitet në ndeshje për shkaqe të pa arsyeshme, ndeshjen e humb me rezultat zyrtar 3:0 dhe mund të dënohet me marrjen (minus pikëve) prej 3 e deri 9 pikëve nga pikat e përgjithshme të fituara, apo të 9 pikëve negative”.

Megjithatë dënimi si në rastin e Prishtinës mund të zhvendoset në stinorin e ardhshëm.

“Ekipi i cili xhirot e fundit nuk udhëton në ndeshje pa arsye mund të dënohet nga Komisioni/komisari i Garave përkatëse me minus tri deri minus gjashtë pikë për sezonin e ardhshëm garues”. /Sporti1/Telegrafi/