Prekazi, trajneri i ardhshëm i Hajvalisë?

Pozita e lirë e trajnerit te skuadra e Hajvalisë si duket nuk do të qëndrojë e tillë edhe për një kohë të gjatë, kjo pasi që së fundmi janë rritur zërat për një nënshkrim të mundshëm me trajnerin mitrovicas, Rafet Prekazin.

Trajneri mitrovicas ditë më parë ka zhvilluar biseda me Hasan Pergjegjajn, që njëherësh është babai i pronarit të klubit, Mehedinit (Meda). Ai thotë se çështjen e zgjidhjes së trajnerit ia kanë lënë pikërisht atij.

“Unë jam duke e zëvendësuar Medën, përderisa ai nuk është në Kosovë. Prandaj, këto ditë m’i kanë propozuar tre emra të trajnerëve: Rafet Prekazin, Bylbyl Sokolin dhe Gani Sejdiun. Të parin e njoh mirë, dhe kemi biseduar disa herë, për Bylbylin kam dëgjuar fjalë të mira, kurse Ganiun nuk e njoh, edhe pse ma kanë lavdëruar”, tregon Pergjegjaj për gazetën Arena.

I pyetur se cili nga këta emra ka gjasat më të mëdha për të marrë drejtimin e skuadrës, ai i jep përparësi të madhe Prekazit. “Mendoj se Rafeti mund të bëjë me lojtarë. Prandaj, unë do t’u them Medës dhe Ragip Muratit (bashkëpronar) për Rafet Prekazin, e më pas u mbetet atyre të vendosin”, shtoi Hasani për gazetën. /Telegrafi/