“Pranvera e vitit 1981, kthesa më e madhe në historinë e Evropës”

Kthesa më e madhe në historinë e Evropës ka qenë demonstrata e vitit 1981. Kështu është thënë në tryezën e organizuar me rastin e 34 vjetorit të “Pranverës shqiptare të vitit 1981”.

Këtë ngjarje ata e titulluan ashtu siç e kishte titulluar edhe vet Ukshin Hoti “Viti 81, nyja e lëvizjes së drejtë të gjërave dhe të proceseve”, i cili ishte njëri ndër figurat më kryesore dhe analizuesi më i madh i kësaj ngjarjeje.

Po ashtu, në shenjë nderimi për dëshmorët e rënë nga këto demonstrata u mbajt një minutë heshtje.

Kjo protestë e cila njihet si revolucion i masës së gjerë shqiptare, ka dhënë mesazhin e qartë se çështja e pazgjidhur shqiptare në Jugosllavi, nuk mund të mbahej më peng nga autoritetet e Beogradit.

Sipas kreut të Shoqatës së ish të burgosurve politikë, Hydajet Hysenit, të gjitha vitet dhe ngjarjet e mëparshme ndihmuan që ngjarja e 81-ës të jetë nyje e zbërthimit të lëvizjeve të drejta të gjërave dhe të proceseve.

“Jo pse ishte një vit çudibërës, por, sepse pikërisht në atë vit ishin pjekur të gjitha kushtet, ishin akumuluar të gjitha kushtet, ishin arritur të gjitha nivelet për shndërrimin e kuantitetit në kualitet. Dhe rastësisht i ndrydhi subjektet që nuk deshën të pajtoheshin me ndrydhjen. Po të ishin pajtuar me ndrydhjen, viti 81 do të kalonte njësoj sikurse edhe vitet e tjera”, tha Hyseni.

Njësoj mendon edhe historiani Hakif Bajrami, i cili tha se pa demonstratat e vitit 1967 dhe vitit 1968 nuk do të mund të shpjegohej ajo e vitit 1981.

Sipas Bajramit, gabimin më të madh që e kanë bërë politikanët në historinë tonë është që e kanë quajtur demonstratën konflikt.

Në demonstratat e vitit 1981 për herë të parë u kërkua që Kosova të jetë Republikë dhe kjo parullë ishte motoja kryesore në atë kohë.

Nga kjo ngjarje, u vranë dhe mbetën të plagosur dhjetëra protestues, si dhe qindra të tjerë ishin lënduar. /KP/