​Këta janë kandidatët e PDK-së që pritet të jenë pjesë e Kuvendit të Kosovës

Ndërkohë që Komisioni Qendror i Zgjedhjeve (KQZ) po vazhdon numërimin e votave. Ndër kandidatët që kanë siguruar ulëset në Kuvendin e Kosovës nga Partia Demokratike e Kosovës (PDK) janë Bedri Hamza, Memli Krasniqi, Vlora Çitaku dhe Përparim Gruda.

Ndërsa, ndër kandidatët që janë afër sigurimit të votave për deputetë janë Xhevahir Geci, Fadil Demaku, Sala Jashari, Petrit Hajdari, Kujtim Gashi dhe Ragip Xhaka dhe Jakup Nura.

Xhevahir Geci për KosovaPress tha se deri më tani ka mbledhur rreth 6 mijë vota dhe pret që së paku t’i dyfishojë ato. Ndërsa Ragip Xhaka u shpreh optimist se “do të jetë pjesë e Kuvendit të Kosovës”, por nuk ka bërë të ditur numrin e votave që ka siguruar.

Ndërkaq, Kujtim Gashi u shpreh se “trendi është pozitiv, porse është herët për të konkluduar”.

Kandidati Jakup Nura tha se sipas informacioneve të marra në terren deri më tani ka siguruar rreth 8 mijë vota. Ndërsa Eliza Hoxha potencoi se nuk ka asnjë informacion zyrtar nga kryesia e PDK-së se sa vota ka mbledhur deri më tani.

Njëjtë u shpreh edhe Valdete Idrizi Deskaj. Ndërkaq, Kristina Gashi Bytyçi kur u pyet nga KosovaPress rreth kësaj tha se “nuk ka asgjë zyrtare”.

Megjithatë, asgjë nuk është zyrtare dhe se numërimi i votave të kandidatëve për deputetë po vazhdon ende. Sipas të dhënave të Komisionit Qendror Zgjedhor deri më 14 shkurt 2025 janë numëruar 876 vendvotime nga 2.533.

Procesi i numërimit të votave ka përfunduar në 9 Qendrat Komunale të Numërimit (QKN) në komunat Novobërdë, Obiliq, Shtërpcë, Junik, Hani i Elezit, Partesh, Ranillug, Kllokot dhe Mitrovicë e Veriut. Aktualisht, procesi i numërimit po vazhdon në 25 qendra komunale të numërimit.

Në bazë të rezultateve preliminare të KQZ-së, ku janë numëruar 99.72 për qind të votave, Lëvizja Vetëvendosje ka fituar 40.84 për qind apo 341 mijë e 672 mijë vota. Partia Demokratike e Kosovës (PDK) 22.15 për qind ose 184 mijë e 499, Lidhja Demokratike e Kosovës (LDK) 17.59 për qind ose 147 mijë 827. AAK-NISMA-Konservatorët-Intelektualët-Ideal 7.47 për qind ose 62 mijë e 309 vota.

Formimi i qeverisë mund të merr kohë, pasi Lëvizja Vetëvendosje edhe me votat e diasporës do ta ketë të vështirë t’i bëjë mbi 50 deputetë dhe vetëm me pakicat, përjashto Listën Serbe, të formojë ekzekutivin.

LVV-së, si parti fituese e zgjedhjeve do të tentojë të formojë qeverinë, por nëse dështon i takon PDK-së si parti e dytë ta bëjë një gjë të tillë. PDK, LDK e AAK kanë hedhur poshtë mundësinë që të hyjnë në koalicion qeverisës me Lëvizjen Vetëvendosje, e kjo e fundit ka thënë se do ta bëjë vetë qeverinë e re.

Në bazë të rezultateve preliminare të Komisionit Qendror Zgjedhor, Lëvizja Vetëvendosje pritet t’i ketë 47 deputetë, Partia Demokratike e Kosovës 25, Lidhja Demokratike e Kosovës 20, koalicioni AAK-Nisma 8 deputetë, ndërsa komunitetet jo shumicë kanë 20 ulëse të rezervuara.

Megjithatë, me numërimin e rreth 100 mijë votave nga diaspora dhe atyre me kusht, partia e Albin Kurtit konsiderohet se mund t’i fitojë edhe dy deri në tre deputetë më shumë.