Po afrohen super-duelet Sigal Prishtina-Besiktas

Për të gjithë adhuruesit e basketbollit në Kosovë, muaji shtator do t’i sjellë dy super-duele tejet të nxehta dhe kualitative mes Sigal Prishtinës dhe klubit të njohur turk, Besiktas.

Bardhekaltërit kanë kryer të gjitha përgatitjet për turneun e tyre parasezonal dhe do të sjellin në Kosovë njërin nga ekipet më të mëdha të basketbollit turk, Besiktas, me të cilin do t’i luan dy ndeshje parasezonale. Ju kujtojmë Besiktas në sezonin 2011/2012 ishin kampione të Turqisë, fitues të kupës Eurochallenge, fitues të Kupës së Turqisë dhe fitues të Kupës së Presidentit të Turqisë.

Ndeshja e parë do të luhet të dielën në palestrën e Pallatit të Rinisë dhe Sporteve në Prishtinë, me 8 shtator në ora 20:00, kurse ndeshja e dytë do të luhet të hënën në Palestrën “Sezai Surroi” në Prizren, me 9 shtator në ora 19:00.

Në këto dy ndeshje do të keni mundësinë t’i shihni për herë të parë përforcimet e Sigal Prishtinës duke luajtur dhe transformimin e madh që ka bërë ky ekip gjatë këtij pushimi. Duke filluar nga të huajt, Hamidu Rahman, Tay Waller, Kendrick Jones dhe Aurimas Kieza, e deri te vendorët, Blerim Mazreku, Muhamed Hasani, Alban Veseli, Kreshnik Juniku dhe Dardan Berisha, të gjithë këta do të jenë të gatshëm dhe do të testohen.

Sjellja e Besiktas në Kosovë ishte edhe premtim i ish-trajnerit të Sigal Prishtinës, Ahmet Kandemirit, i cili tashmë është emëruar si trajner i këtij klubi.

Ardhja e Besiktas në Kosovë ka domethënie të madhe për vazhdimin e ndërkombëtarizimit të sportit dhe basketbollit kosovar në përgjithësi. /Telegrafi/