Plisat premtojnë spektakël

Lajmin për pranimin e Sigal Prishtinës në Ligën Ballkanike më së miri e kanë pritur tifozët e klubit bardh e kaltër, “Plisat”. Ata janë shprehur shumë të lumtur me këtë fakt dhe kanë premtuar se do në palestrat kosovare do të sjellin atë që nuk është parë më parë duke qenë shembull edhe për skuadrat e rajonit.

“Pranimi i Sigal Prishtinës në BIBL nuk është gëzim vetëm i Plisave dhe qytetarëve të Prishtinës por i tërë Kosovës. Ne, Plisat ashtu edhe klubi ynë i zemrës, Sigal Prishtina, kemi qenë dhe jemi të përgatitur për të marrë pjesë në këtë ligë dhe do të përfaqësojmë Kosovën me shumë krenari”, ka thënë kryetari i tifozerisë bardh e kaltër, Albert Kastrati, për Zërin.

“Të mos harrojmë se ne jemi e vetmja tifozeri që asnjëherë nga pas lufta nuk e kemi ndërprerë aktivitetin tonë në përkrahje të klubit tonë të zemrës. Ju garantojmë se do të jemi shembull i organizmit të ndeshjeve dhe mikpritjes së mysafirëve të rajonit”, shtoi Kastrati më tutje.

Në fund ai falënderoi edhe kryesinë e klubit që gjithmonë u kanë qëndruar pranë. “Në emër të Plisave dëshiroj të falënderoj edhe kryetarin dhe kryesinë e Sigal Prishtinës duke mos i harruar asnjëherë edhe të gjithë ata persona që në të kaluarën kontribuuan në sukseset e klubit tonë”, përfundoi Albert Kastrati. /Telegrafi/