Përfundon në mënyrë paqësore protesta e opozitës në Shqipëri

Protesta e opozitës, thirrur nga kryetari i Partisë Demokratike Sali Berisha është mbyllur në mënyrë paqësore, ashtu si edhe nisi.

Protestës iu bashkuan qytetarë nga i gjithë vendi, teksa zona nga Bulevardi “Dëshmorët e Kombit” e deri te Sheshi “Skëndërbej” ishte i mbushur me protestues.

Gjatë fjalës së tij, Berisha hodhi akuza në drejtim të kryeministrit Edi Rama, teksa e cilësoi si një armik.

Kryedemokrati i tha se nuk do ia falë votën dhe nuk do e njohë pushtetin mbi votën e vjedhur.

Ndër të tjera, Berisha bëri thirrje Bashkimit Evropian që të mos ndëshkojë shqiptarët për keqqeverisjen e Ramës.

Kryedemokrati iu bashkua protestës pasi doli nga selia blu bashkë me deputetë dhe të rinj, dhe iu drejtuan në këmbë bulevardit para Kryeministrisë.

Lexo po ashtu Berisha, Edi Ramës: Ne të dy jemi armiq, boll vodhe, ik

Para se të mbërrinte në selinë blu, Berisha u shpreh për Euronews Albania se protesta e sotme do të jetë e fuqishme.

Protesta kishte moton “Shqipëria në rrezik, mos thuaj ç’më duhet mua”, ndërsa Partia Demokratike ka kërkoi 2 orë leje në policinë e Tiranës.

Dyert e godinës së Kryeministrisë dhe të Kuvendit ishin të blinduara.

Mbi 1000 efektivë të policisë u angazhun në terren mes të cilëve forca të rendit, të Ndërhyrjes së Shpejtë, repartit Shqiponja dhe punonjës të Gardës.

Ashtu si në protestat e tjera, kishte kordon policie para Kryeministrisë, ndërsa Forcat e Ndërhyrjes së Shpejtë qëndruan në mbikëqyrje të situatës dhe në gatishmëri për çdo rast.

Qe prej orës 16:00 nisën kufizimet në qarkullimin rrugor në bulevardin “Dëshmorët e Kombit”, Rruga “Xhorxh Bush” dhe pjesërisht rruga “Zhan Dark”.