Përfundon faza e parë e kampit veror për hendbollistë

Sot është dita e fundit e fazës së parë të kampit veror për grupmosha U16, U18 dhe U19 në hendboll. Në palestrën “Shani Nushi“ në Gjakovë për shtatë ditë rresht me intensitet të shtuar kanë stërvitur 53 hendbollistë të këtyre grupmoshave.

Përgatitjet janë udhëhequr dhe mbikëqyrur nga përzgjedhësi i përfaqësueses së Kosovës Alfred Llazari dhe bashkëpunëtorët Fatmir Muhaxheri dhe Verim Zherka, të cilët janë ndarë shumë të kënaqur me punën dhe angazhimin e hendbollistëve.

Gjakova do të vazhdojë të jetë qendër e këtyre aktiviteteve pasi që të premten e kësaj jave do të fillojë faza e dytë, e cila do të përfundojë me 14 gusht.

Përderisa faza e parë ishte e përqendruar në aspektin fizik, e dyta do të fokusohet në atë taktik. Kampi është organizuar nga Federata e Hendbollit të Kosovës në bashkëpunim me Departamentin e Sporteve të Kosovës dhe Drejtoratin për Rini dhe Sport të KK Gjakovës.

Më 17 gusht në Vestrem të Hungarisë organizohet turneu prestigjioz tradicional për këto grupmosha ku do të merr pjesë edhe Kosova. /Telegrafi/