Për çfarë po përgatiten rusët? Automjetet ushtarake ruse, drejt një “udhëtimi të ngrirë” (Foto)

Pajisjet ushtarake ruse janë vënë në një testim rreth asaj se si do të përballonin të ftohtit, në rast nevoje, duke u drejtuar drejt Arktikut.

Siç shkruajnë mediat e huaja, përcjell Telegrafi, gjatë disa javëve të ardhshme, ato do të kalojnë përmes një rrugëtimi të vështirë nga fshati Tiksi në republikën e largët ruse të Yakutia (rreth 5,000km nga Moska) drejt Ishullit Kotelny.

Bëhet e ditur se ata do të udhëtojnë nëpër borë dhe akull në Detin Laptev, një det margjinal në Arktik, duke mbuluar rreth 2,000 kilometra hapësirë.

Temperatura në këtë zonë tani është rreth -30 gradë celsius, e cila llogaritet si mjaft e butë për rajonin, duke pasur parasysh se ato mund të jenë dyfish më të ulëta në këtë pjesë.

Megjithatë, vlerësohet se kjo nuk duhet të jetë një problem për njësitet: ata janë të gjithë të veshur me uniforma Arktik, dhe makinat janë të pajisura me lëndë djegëse, të mjaftueshme, dhe të specializuara për kushtet e vështira të Arktikut.

Automjetet do të vihen në provë për të parë nëse ata mund të funksionojnë si duhet në temperatura të ulëta, stuhi të rënda (me shpejtësinë e erës mbi 35 metra për sekondë), dhe borë të thellë. /Telegrafi/