Pa marrëveshje, s’ka BE për Serbinë dhe Kosovën

Joost Lagendijk, raportues shumëvjeçar për Kosovën dhe Ballkanin në Parlamentin Evropian, ka deklaruar se, as Serbia e as Kosova nuk do të hyjnë në Bashkimin Evropian derisa të mos arrijnë një marrëveshje të ndërsjellë, respektivisht pa pasur një bashkëpunim bilateral dhe regjional.

I pyetur se çka është më e rëndësishme për Ballkanin – bashkëpunimi rajonal në relacionin Serbi-Kosovë, apo bashkëpunimi me Tribunalin e Hagës, Lagendijk për gazetën Danas ka vlerësuar se që të dyja këto janë të një rëndësie jetike.

“Frikohem se që të dyja janë të një rëndësie kyçe. Nuk duhet të hyjmë në lojëra ku duhet zgjedhur. Serbia dhe Kosova nuk do të hyjnë në BE derisa nuk arrihet një marrëveshje mes tyre, respektivisht pa një bashkëpunim bilateral e rajonal", ka thënë Lagendijk.

Sipas ish-deputetit holandez në Parlamentin Evropian, i cili tashmë punon në Qendrën për Politikë të Stambollit – Ballkani si tërësi absolutisht e ka të domosdoshme të ballafaqohet me historinë e re, në mënyrë që shtetet e këtij rajoni të transformohen në (shtete) demokratike, të gatshme për të hyrë në Bashkimin Evropian. /Telegrafi/