OBSH kundër përdorimit të dy shurupeve indiane të kollës për fëmijët, që janë të lidhur me vdekjet në Uzbekistan

Organizata Botërore e Shëndetësisë ka paralajmëruar kundër përdorimit të dy shurupeve indiane të kollës për fëmijët – Ambronol dhe Dok-1 Max – që janë lidhur me vdekjet në Uzbekistan.

Sipas BBC, përcjell Telegrafi, OBSH tha se produktet, të prodhuara nga Marion Biotech, ishin “nën standard” dhe se firma kishte dështuar të jepte garanci për sigurinë e tyre.

Alarmi vjen disa javë pasi Uzbekistani pretendoi se 18 fëmijë vdiqën pasi konsumuan një shurup të prodhuar nga kjo kompani.

Firma nuk ka komentuar ende mbi alarmin ndërkohë që BBC thotë se ka kontaktuar Marion Biotech dhe ministrinë e shëndetësisë së Indisë për koment.

Gjithashtu, shton mediumi në fjalë, pasi u raportuan vdekjet në Uzbekistan, ministria e shëndetësisë e Indisë pezulloi prodhimin në kompani.

Këtë javë, departamenti i sigurisë ushqimore në shtetin verior të Uttar Pradesh – ku është vendosur Marion Biotech – pezulloi gjithashtu licencën e prodhimit të kompanisë.

Në alarmin e lëshuar të enjten, OBSH tha se një analizë e dy shurupeve të kollës – Ambronol dhe Dok-1 Max – nga laboratorët e kontrollit të cilësisë të ministrisë së shëndetësisë të Uzbekistanit gjeti sasi të papranueshme të dy ndotësve – “diethylene glycol and/or ethylene glycol”.

Këta dy përbërës thuhet se janë toksike për njerëzit dhe mund të jenë fatale nëse konsumohen.

India njihet si “farmacia e botës” pasi prodhon një të tretën e barnave në botë, duke plotësuar shumë nga nevojat mjekësore të vendeve në zhvillim.

Vendi është gjithashtu shtëpia e disa prej kompanive farmaceutike me rritje më të shpejtë.

Por industria ka qenë nën një kontroll të shtuar pasi shurupet e kollës të prodhuara nga kompanitë indiane janë lidhur me vdekjet e fëmijëve në vende të tjera.

Në tetor, OBSH kishte dhënë një alarm të ngjashëm, duke lidhur katër shurupe kundër kollës të prodhuara nga një firmë tjetër indiane me vdekjen e 66 fëmijëve nga dëmtimet e veshkave në Gambia.

Si qeveria indiane ashtu edhe kompania, Maiden Pharmaceuticals, i kanë mohuar akuzat. /Telegrafi/