Obama: Bashkëpunimi nuk është zgjedhje, por rruga e vetme

Me thirrjet "Obama president", dhjetëra mijëra njerëz mirëpritën fjalimin e kandidatit presidencial amerikan, Barack Obama, në një nga sheshet e Berlinit.

"Ky qytet si çdo qytet e njeh ëndrrën e lirisë", tha Obama, duke shtuar se liria e sotme i detyrohet bashkëpunimit amerikano-evropian pas Luftës së Dytë Botërore.

Rrëzimi i Murit të Berlinit, shtoi Obama, u ndje në të gjithë globin dhe rrëzoi muret nga Kjevi në Kejptaun.

"Muret u rrëzuan jo vetëm në Berlin, por dhe në Belfast, ku katolikët dhe protestantët gjetën rrugën për të jetuar së bashku; në Ballkan, ku Aleanca jonë Atlantike i dha fund luftërave dhe i solli kriminelët e luftës para drejtësisë; në Afrikën e Jugut, ku njerëzit kurajozë i dhanë fund aparteidit", tha Obama.

Por, ai shtoi se për t’iu përgjigjur sfidave globale duhet rritur bashkëpunimi dhe duhet ndarë barra e përgjegjësive. Asnjë vend sado i fuqishëm të jetë nuk mund të punojë i vetëm.

"Ndryshimi i lidershipit në Uashington nuk do të lirojë evropianët nga barra e përgjegjësisë. Në këtë shekull të ri, si amerikanët dhe evropianët duhet të bëjnë më shumë dhe jo më pak. Partneriteti dhe bashkëpunimi mes vendeve nuk është zgjedhje, është rruga e vetme për të mbrojtur sigurinë tonë të përbashkët".

Senatori Obama përpara mbi 100 mijë pjesëmarrësve në shesh nuk harroi të kujtonte historinë e jetës së tij, si bir i një studenti afrikan, gjyshi i të cilit ka qenë shërbetor për kolonizatorët britanikë në Kenia.

Turneu evropian i Obamës pas Berlinit vazhdon me Parisin dhe Londër.REL