Ngjyrat e shtetit në raportet e huaja të progresit

Hilmi Gashi

Raportet e ndryshme të progresit të publikuara për Kosovën, qoftë nga Komisioni Evropian, Departamenti Amerikan i Shtetit, organizatat internacionale, si dhe ato te vendit, përvitshëm vazhdojnë të bëjnë jehonë në Prishtinën zyrtare. E, si të gjitha herët e tjera, pozita dhe opozita gëzohen nga këto raporte. E para gëzohet, sepse janë realizuar disa parime, ndërsa e dyta gëzohet, sepse nuk janë realizuar disa të tjera.

E njëjta histori përsëritet çdo vit. Megjithatë, Kosova është në rrugën e duhur drejt integrimit evropian, një union i shumë etnive dhe nacionaliteteve. Kështu thuhet të paktën në Bruksel, por më shumë në Prishtinë.

Për shumë diplomatë evropianë, gota vazhdon të jetë gjysmë plotë. Kjo do të thotë në një mënyrë se vendi ka ende shumë punë për të bërë, meqë ka vite që kjo “gotë” parimesh vazhdon të qëndron në tavolinën e zyrave të ambasadorëve perëndimorë në kryeqytetin tonë, pa u mbushur. Raporti i progresit i këtij viti për Kosovën i Komisionit Evropian, sivjet koincidon me fushatën për zgjedhjet lokale të 3 nëntorit. Në gjithë këtë zhurmë parazgjedhore, vështirë është të pritet një përqendrim më serioz i politikanëve dhe partive tona në përmbajtjen e këtij raporti.

Ndërsa, duhet thënë fare hapur që rruga për në BE është shumë e gjatë me sfida dhe detyra vëllimore të cilat nuk mund të kalohen lehtë me këtë ritëm të politikave dhe qeverisjes të stigmatizuara gjithnjë me krimin e organizuar dhe korrupsionin. Raporti i sivjetmë i progresit nga Komisioni Evropian edhe njëherë venë në pah ngjyrat e zeza të shtetit të Kosovës ku beteja më e madhe mbetët mos-luftimi i krimit të organizuar dhe korrupsionit, elemente këto të cilat e rëndojnë varkën e klasës politike për të udhëtuar sigurte drejtë strukturave euro-atlantike.

Duhet pranuar haptazi, ne jemi larg të qenit një demokraci e qëndrueshme. Jemi ende në kërkim e sipër, për shkaqe fare mirë të njohura, të stabilizimit të brendshëm politik që njeh integritetin e vendit si një arritje tashmë të siguruar. Zgjedhjet lokale dhe ato parlamentare që nga paslufta e deri më tani janë manipuluar në një masë bukur të madhe, më çka është shkelur drejtpërdrejtë testi i demokracisë në sytë e faktorit jo vetëm vendor por edhe atij ndërkombëtarë. E kush mund të besoj tashmë për një mbarëvajtje të suksesshme dhe transparente të zgjedhjeve të 3 nëntorit? Kjo le të vërtetohet në ditën e gjyqit të qytetarit.

Fatkeqësisht, klasa politike i ka një ‘borxh’ të madh politik popullit, ku e gjithë periudha që nga pas-lufta e këndej mu atëherë kur është shpresuar dhe besuar për më të mirën e mundshme, qytetarit i është servuar një devalvim i mirëfilltë demokratik, më çka sot vështirë së mund të ndërtohet për një kohë të shkurtër një besim i denjë siç e kishin atë kohë. Mbetet punë e madhe për t’u bërë në taborin e shtëpisë sonë, përfshirë sundimin e ligjit dhe luftimin e krimit të organizuar dhe korrupsionit, një nderë elementet më qenësore dhe të ndjeshme të vendit që shtetit tonë vazhdojnë të i japin ngjyrë të zezë në raportet e ndryshme evropiane dhe ndërkombëtare të progresit.