Në vend të Bursaspor, Kosova përballë Renovës

Pas dështimit të ndeshjes ndaj kampionit të Turqisë, Bursaspor, përfaqësuesja e Kosovës në futboll do të ndeshet me kampionin e Maqedonisë, Renovën nga Tetova.

Në një komunikatë të lëshuar nga FFK-ja, bëhet e ditur se përzgjedhësi i përfaqësueses së Kosovës, Albert Bunjaku, ka bërë gati skuadrën e tij për ndeshjen e 27 marsit ndaj Renovës në Stadiumin e Prishtinës, me ç’rast është mbajtur dhe një konferencë për shtyp.

“Ne jemi duke ndërtuar një përfaqësuese të fuqishme për një të ardhme, ani pse kemi shumë vështirësi në këtë drejtim sidomos me lojtarët që luajnë nëpër klubet evropiane. Prandaj, në duhet të punojmë që ta rrisim cilësinë e Superligës së Kosovës dhe në këtë drejtim ne kemi organizuar Kampin kombëtar U-15 pastaj kemi hapur edhe shkollën për portier mungesa e të cilëve ndihet shumë në Kosovë. Për këtë grumbullim mungojnë shumë lojtarë cilësorë që janë të angazhuar nëpër klubet evropiane përkundër dëshirës së tyre të madhe që të jenë pjesë e përfaqësueses së Kosovës”.

“Sidoqoftë ne këto ditë do t’i shfrytëzojmë të shohim se ku gjendet ky potencial aktual dhe ndeshja me Renovën do të jetë një test i mirë. Falënderojmë krerët e klubit që kanë mundësuar zhvillimin e kësaj ndeshje”, deklaroi me këtë rast Albert Bunjaku.

Nga ana tjetër pa u shprehur nuk mbeti as trajneri i Renovës, Bylbyl Sokoli, i cili tha: “Ndihem i nderuar që me skuadrën time e cila tashmë tri vite bën pjesë në garat e Evropës, që të takohet të dielën me përfaqësuesen e Kosovës. Ne shpresojmë se do të jemi një rival i denjë dhe se shikuesit do të kenë rastin të shohin një lojë mjaft të mirë dhe cilësore. Është për t’u përshëndetur edhe angazhimi i krerëve të FFK-së, të cilët po angazhohen që të sigurojnë ndeshje të tilla për përfaqësuesen e Kosovës, ndonëse unë uroj që në të ardhmen të sigurohen ndeshje me përfaqësuese të shteteve të ndryshme, por në rrethanat në të cilat ndodhet futbolli i Kosovës, atëherë duhen përshëndetur edhe ndeshjet me skuadra”.

Futbollistët e ftuar nga përzgjedhësi Albert Bunjaku:
Etrit Berisha(Kalmar), Anjel Rashkaj e Kujtim Bala(Hlamstad BK), Ardian Gashi(Helsinborg IF), Valdet Rama, Kushtrim Lushtaku(Orebro SK), Avni Pepe(Start IK), Enis Alushi(SC Paderborn), Shqipëron Skeraj(pa klub), Faton Toski(Bochum), Shqipëron bektashi(Freiburg), Alban Rama(Erzgebirge Aue), Ilir Nallbani e Liridon Kukaj(Vllaznia), Kristian Nushi(St. Gallen), Fisnik Papuçi, Mentor Zhdrella(Hysi), Ilir Berisha(Prishtina), Dardan Rexhepi(Academy Juventus), Valmir Bytyqi(Besa); lojtarë 16-18 vjeçar: Berat Ahemti, Argjend Mustaf e Gentrit Begolli(Prishtina), Leart Emini e Veton Shabani(Trepça).

/Telegrafi/