Ndeshjet e barazhit luhen më 3 dhe 4 qershor

Ndeshjet e barazhit në futbollin e Kosovës pritet të zhvillohen më 3 dhe 4 qershor. Këtë vendim e ka marrë Komiteti Ekzekutiv i Federatës së Futbollit të Kosovës (FFK) në mbledhjen e mbajtur të enjten.

“KE mori vendim që ndeshjet e barazhit për Superligë të zhvillohen më 3 e 4 qershor në stadiumin e qytetit në Prishtinë. Më 3 qershor do të zhvillohet ndeshja ndërmjet skuadrës e cila renditet në vendin e 9 në Raifeissen Superligën dhe skuadrës së Ligës së Parë që do të renditet në vendin 4-t në Ligën e Parë. Ndërsa më 4 qershor do të zhvillohet ndeshja ndërmjet skuadrës e cila renditet në vendin e 10 në Superligë dhe skuadrës së Ligës së Parë që renditet e treta në tabelë”, thuhet në njoftimin e lëshuar nga FFK-ja, transmeton Epokaere.

Këto ndeshje pritet të zhvillohen nga ora 17:00. Ndërkaq, ndeshjet e barazhit për Ligën e Parë dhe të Dytë do të zhvillohen më 5 qershor në stadiumin “Agron Rama” në Kastriot. Ndeshja e parë do të zhvillohet nga ora 14:30, ndeshja e dytë do të zhvillohet në orën 17:00. Do të takohen skuadrat e Ligës së Parë që renditen në vendin e 13 dhe 14-t me dy skuadrat e renditura në vendet e dyta në grupin “A” dhe “B”. E ndeshja finale e Kupës së Kosovës do të zhvillohet më 7 qershor në orën 17:00 në stadiumin e qytetit në Prishtinë. /Telegrafi/