Ndalimi i plakjes përmes ndryshimeve pozitive në stilin e jetesës

Ndryshimet pozitive në stilin e jetesës, si mbajtja e një diete të shëndetshme dhe ushtrimi i moderuar, mund ta ngadalësojnë procesin e plakjes, konkludohet nga studimi i publikuar në revistën “Lancet Oncology”.

Hulumtuesit nga Universiteti i Kalifornisë kanë zbuluar se disa ndryshime në stilin e jetesës mund ta rrisin gjatësinë e telomereve. Për nevoja të studimit, autorët e studimit analizuan dy grupe të njerëzve të diagnostikuar me kancer të prostatës me rrezik të ulët, transmeton koha.net. Në asnjërin grup nuk kishte trajtime konvencionale të kancerit, si kirurgjia apo rrezatimi

Nga të intervistuarit në grupin e parë u kërkua të ndryshonin stilin e jetesës së tyre duke futur në dietë drithëra, fruta dhe perime, duke ushtruar në mënyrë të moderuar, duke i menaxhuar situatat stresuese nëpërmjet teknikave të veçanta, si meditimi dhe joga, duke qenë më intimë dhe duke u socializuar më shumë me njerëz të tjerë.

Të anketuarit e grupit të dytë nuk aplikuan asnjë ndryshim. Hulumtuesit matën gjatësinë e telomereve në fillim të studimit dhe përsëri në fund, pas pesë viteve.

Studimi tregoi se në grupin që aplikoi ndryshimet në mënyrën e jetesës erdhi deri tek zgjatja e telomereve me 10 për qind, ndërsa tek meshkujt të cilët nuk i kishin ndryshuar shprehitë e tyre erdhi tek një reduktim prej 3 për qind.

Sa më shumë ndryshime pozitive kishin aplikuar të anketuarit në stilin e jetesës së tyre, zgjatja e telomereve ishte më e lartë. Telomeret janë të vendosura në skajet e kromozomeve, duke i mbrojtur ato nga dëmtimi dhe duke e kontrolluar procesin e plakjes. Nëse telomeret shkurtohen apo dëmtohen, qelizat plaken dhe vdesin, duke e shkaktuar procesin e plakjes.

Hulumtuesit theksojnë se një hulumtim i mëtejshëm, i cili do të përfshinte një numër të subjekteve të ndryshme, do të ishte i dobishëm në zbulimet e ardhshme të ndikimit të stileve të jetesës në gjatësinë e telomereve. /Telegrafi/