NATO: Do ta mbrojmë çdo pëllëmbë të Aleancës

Aleanca Veri-Atlantike, ka shprehur gatishmërinë për siç ka thënë “mbrojtjen e çdo pëllëmbe të territorit të NATO-s”.

Në reagimin e fundit të NATOS, thuhet se njësitet e Forcës së Reagimit kanë mbërritur në Rumani gjatë së hënës dhe së martës.

Sipas tyre, kjo është hera e parë që NATO-ja ka aktivizuar Forcën e Reagimit për mbrojtje kolektive dhe parandalim.

“Njësitet e Forcës së Reagimit të NATO-s arritën në Rumani të hënën dhe të martën, për të përforcuar pozicionin e mbrojtjes së Aleancës në pjesët lindore. 500 trupa franceze janë mbledhur në Istres të Francës jugore, përpara se të zbarkonin në Rumani”, thuhet në njoftim.

Tutje, NATO thekson se ky mobilizim vjen si rrjedhojë e “krizës më të madhe të sigurisë në Evropë në dekadat e fundit, pas pushtimit të Rusisë nga Ukraina”.

Sekretari Gjeneral i NATO-s, Jens Stoltenberg ka mirëpritur këtë lëvizje të forcave të Aleancës.

“Gjatë javëve të kaluara, ne kemi rritur prezencën në pjesët lindore të Aleancës dhe tani, për herë të parë në histori jemi duke zbarkuar edhe Forcën e Reagimit të NATO-s. Trupat franceze kanë arritur në Rumani si element udhëheqës i kësaj force”.

“Përkushtimi ynë ndaj Nenit 5, për mbrojtjen kolektive, është i hekurt. Do ta mbrojmë secilën pëllëmbë të territorit të NATO-s”, ka thënë ai.