Mustafa: Zhvillimi ekonomik prioriteti kryesor i Qeverisë

Kryeministri i Kosovës, Isa Mustafa, priti të mërkurën në takim lamtumirës menaxherin e Bankës Botërore për Kosovë, Jan-Peter Olters.

Kryeministri Mustafa e falënderoi për punën e bërë duke e vlerësuar lartë bashkëpunimin ndërmjet institucioneve të Kosovës dhe BB-së, gjatë kësaj periudhe.

Kryeministri Isa Mustafa, po ashtu, shprehu interesimin e Qeverisë për bashkëpunim të mëtutjeshëm sidomos në sektorin e energjisë, ku BB-ja ka qenë përkrahëse e projektit “Kosova e Re”.

Përkundër situatës politike në vend, kryeministri tha se Qeveria ka punuar mjaft shumë në ekonomi, duke e njoftuar Olters edhe për vendimin e marrë sot në Qeveri për të ndërmarrë hapat e nevojshëm për përmirësimin e ambientit të të bërit biznes.

“Qeveria është e interesuar të vazhdojë dhe të rrisë bashkëpunimin me institucionet financiare ndërkombëtare, si Banka Botërore, Banka Evropiane për Investime, BERZH-i, FMN-ja etj. Kosova ka nevojë të identifikojë përparësitë krahasuese me vendet e ra jonit dhe të rrisë konkurrencën, dhe pas nënshkrimit të MSA-së, edhe me vendet e BE-së të rrisim konkurrueshmërinë. Po ashtu, të krijojmë kushte për investime të huaja direkte. Në këtë drejtim kemi ecur përpara me Ligjin për Investime Strategjike dhe duhet të punojmë që të avancojmë sektorin minerar”, tha kryeministri Mustafa, duke shtuar se kjo Qeveri nuk ka objektiv më të rëndësishëm se sa zhvillimin ekonomik, pasi që problemet themelore në Kosovë lidhen me papunësinë.

Menaxheri i Bankës Botërore në Kosovë, Jan-Peter Olters u shpreh i kënaqur me bashkëpunimin gjatë punës më shumë se katër vjeçare në Kosovë, duke thënë se gjatë kësaj periudhe ka vërejtur progres evident. Ai, po ashtu, tha se BB njeh hapat e rëndësishëm që janë arritur në sektorin energjetik në vend, duke u shprehur optimist për të ardhmen e Kosovës.

Olters po ashtu vlerësoi stabilitetin fiskal, stabilitetin bankar, dhe faktin se Kosov a ka një popullsi të re dhe me potencial për zhvillim të mëtejshëm, si dhe theksoi se zgjidhja e pengesave në sektorin e energjisë do të rriste potencialin e Kosovës për zhvillim të shpejtë, pasi që ekonomia e Kosovës ka shumë elemente pozitive.